Dimapur, 2 December: Saturday din Naga People’s Front (NPF) president, Dr Shürhozelie Liezietsu pora, NPF toh Naga manu laga party ase aro party’s laga main aim toh Naga manu laga phal nemide ase koikena janaideya thakise. Pfutsero multi-purpose hall jaga deh NPF Phek division pora one day seminar lowah time deh Shürhozelie pora kowah toh, State deh besi regional political party toh ahhise aro tai khan khali election contest korise nahoile power aro poisa karni korise. Hoilebe tai khan laga party nesana nahoi-kena NPF toh Naga manu khan ke bachabole ahha ase. Aro Naga political dekthari pai thaga ke pari najaa thak thakibole ase, koikena tai janaise. Tai aro janaideya toh, NPF toh Naga political issue deh hotai khara kori thakibo aro Naga manu laga identity toh bachai rakhbo. Shürhozelie pora kowah toh, poisa aro power karni besi Naga leaders khan toh ekta political party pora tusara political deh jai. Hoilebe hosa laga leader (true leader) toh hotai faithful thaki-kena NFP party lohofr thakibo. Tai kowah toh, besi regional political parties khan State deh thakibole napari kena fail hoise. Etu toh Naga manu nemide principle aro ideology komti howah pora ase. Aro aji kali ruling Government logode NGPP thaga be joldi haraijabole biswas kori ase, koikena janaise. Tai pora kowah toh, Isor toh Naga manu logode morom kori, hoilebe ami khan toh poisa aro power pora sukhu andha ase. Tai tai NPF leaders logode Naga manu aro tai khan laga phal nemide khara kori thakibole janaideya thakise. Khobor manu logode kotha kora time deh NPF secretary general aro MP Rajya Sabha, KG Kenye pora kowah toh, NPF party toh desh laga second sobse purana regional political party ase. NPF party laga main aim toh Naga political issue laga resolution aro Naga manu laga identity thek pora rakhi kena bachabole laga ase. Kenye pora hosiyar janaideya toh, Naga manu khan logode ketya-hoilebe (anytime) key-key hobo. Ami khan laga identity bachai kena thek pora nathaga tak pahar force khan sosta pora kushi kena kabcha (captured ) koribole chance ase koise, koikena janaise. Welcome address time deh Former Minister aro MLA, Yitachu pora kowah toh, NPF party laga main principle aro ideology toh Naga manu laga identity bachabole aro bachaikena rakhibole laga ase. Aro NPF party toh Naga manu laga general character ase. Yitachu pora party workers khan logode true spirit pora agae jabo koikena janaideya thakise. Seminar time deh NPF Phek Division pora Shurhozelie Liezietsu laga leadership, President NPF aro NPF Legislature party laga leader TR Zeliang logode support koribole namise. NPF Phek Division legislators laga leadership gara (strengthen ) hobole thek pora meli thakibo aro support kori thakibole manise.
Add Comment