Mumbai, February 07: Shah Rukh Khan aro Farah Khan tu Main Hoon Na 2 karney aro ekbar eksath kaam kuribole asey. Etu film tu etya development stage te asey. Aro Shah Rukh Khan para etu film te tailaga monjuri didisey.
Ekta report hisap te, Shah Rukh Khan tu Main Hoon Na logotey bisi close asey. Kilemaney Red Chillies banner under te ola etu first film thakisey. Tai Part 2 tu aney naam-saam banabole mon thakanai. Hoilebi Farah Khan para present kora idea tu khusi paisey.
Etu report te enaka koisey, “Farah para Main Hoon Na 2 nimitey ekta idea olaisey aro tai part 2 nimitey lobole plan kora rasta tu Shah Rukh para khusi paisey. Farah tu etya tailaga writers team, kun khan Red Chillies logotey bi kaam korey, taikhan logotey screenplay banabole kaam kuri asey.”
Etu report para agey barikina koisey, “Shah Rukh Khan para Farah aro tailaga Red Chillies team laga writers khan ke screenplay te bhal para kaam kurikina enaka kahani banabole disey kuntu toh first part para bi bhal hobo. Tai first script tu 2025 laga middle faley hunikina etu te faisla lobole nisna asey. Etu script tu etya development stage te asey.”
Main Hoon Na tu 2004 te release hoisiley. Etu film tu Farah Khan para first direct kora film thakisey. Shah Rukh Khan laga alava etu film te Sushmita Sen, Zayed Khan aro Amrita Rao bi thakisey.
Add Comment