New Delhi, February 08: Finance Minister Nirmala Sitharaman para Saturday te koisey ki tai tu aha hapta Lok Sabha te nutun income tax bill introduce kuribole asey, kuntu para 6 saal purana Income Tax Act ke replace kuribo.
Lok Sabha te introduce kora picheyte, etu bill ke jaanch kuribole nimitey parliamentary standing committee ke pathaidibole asey.
Prime Minister Narendra Modi para chola, Union Cabinet para Friday din te etu bill approve kurisey.
Sithaeaman para RBI laga central board of directors logotey post-Budget customary meeting kora picheyte media ke kotha kurithaka homoitey enaka koisey, “Juwa kali, Cabinet para New Income Tax proposal ke clear kuridisey, ami etu ke aha hapta Lok Sabha te introduce kuribole akha kuri asey. Etu picheyte etu committee laga haath te jabo.”
Parliamentary committee para etu te recommendation diya picheyte etu bill tu aro Cabinet logotey jabole asey. Cabinet para approve kora picheyte, etu ke parliament te aro ekbar introduce kuribo.
Etu nutun income tax law lagu kuribole laga bari te sawal huda homoitey Sitharaman para enaka jawab disey, “Ami etya bi aro 3ta jaruri stage par kuribole baki asey.”
Sitharaman para Income Tax Act, 1961 laga bhal para review kuribole laga announcement tu first July 2024 Budget te kurisiley.
Central Board of Direct Taxes (CBDT) para etu review opor te sabole aro Income Tax Act ke khata, clear aro bujibole asan banabole nimitey ekta internal committee banaisey.
Etu opor te Income Tax Act laga alag alag aspect ke review kuribole nimitey 22 specialised sub-committees banaisey.
Add Comment