New Delhi, February 08: Bharatiya Janta Party (BJP) para Delhi assembly election jitisey aro 27 years picheyte India laga capital Delhi te government form kuribole asey. Aam Aami Party (AAP) kun juwa duita election te bisi vote paikina jitisiley, tai tu 10% maan vote share haraidisey.
2025 Delhi assembly election te BJP laga vote share tu 45.76% thakisey. AAP laga share tu 43.55% thakisey aro Congress laga share tu 6.36% thakisey.
Juwa bar(2020) laga election te AAP para 53.27% laga vote share logotey 62 seat jitisiley. Etu bar AAP para 22 seat jitisey. Etu matlab tu AAP para 10% vote share haraidikina 40 seat maan harisey. Utu homoitey BJP laga vote share tu 38.51% thakisey. BJP laga vote share tu etu bar 7% maan uthikina 40 seat maan kamaisey.
AAP para eman bisi seat hara te Congress laga bi haath thakisey. Congress laga vote share tu 4.26 para uthikina 6.36 hoijaisey. Kuntu nimitey AAP laga vote share komti hoijaisey.
Delhi assembly election te Muslim votes alag thaka tu dikhisey. Hoilebi etu laga bawajut AAP tu 7 seat majotey 6ta seat jitibole parisey kuntu te Muslim community laga candidate kha asey.
Delhi Assembly te 4ta Muslim candidate jitisey, juwa bar para 5jun komti. Etu 4jun Muslim candidate tu : Ballimaran laga Imran Hussain (AAP), Matia Mahal laga Aaley Mohammed Iqbal (AAP), Okhla laga Amanatullah Khan (AAP) aro Seelampur laga Chaudhary Zubair Ahmad (AAP) thakisey.
2020 te AAP para bisi Muslim manu khan thaka jaga laga 7ta seat bi jitisiley- Okhla, Babarpur, Mustafabad, Seelampur, Matia Mahal, Ballimaran aro Chandni Chowk. Etu bar Mustafabad ke charikina, AAP para 6ta Muslim dominated jag ate seat jitisey. Mustafabad te Muslim manu khan laga vote tu AAP, AIMIM aro Congress majotey bhak hoisey.
Add Comment