Art & Culture Department pora Cultural Show loise
Kohima, 03 November: Monday din Hornbill festival Kisama jaga deh Art & Culture Department pora cultural show dekhaideya thakise. Aro Nagaland laga alag-alag tribes pora alag-alag act kora thakise. Dr. Sachindanand Joshi toh Chief Guest thakise. Programme laga host toh, Advisor , Rural Development Dr. Nicky Kire aro Advisor F&ES, SIRD, R&R Phowang Konyak thakise. Event time deh Dr. Sachindanand pora kowah toh, Hornbill festival pora Nagas laga talent aro creativity dekhi. Etu pora Indian civilisation laga rich cultural heritage deh melaideh. Hornbill festival deh melikena thaga karni Joshi toh ektum kushi powah kotha janaideya thakise aro State logode IGNUCA association mela-meli thaga pora ahhibole din time be gara thakibole biswas janaideya thakise. Culture program toh Angami tribe laga moda khan pora Phita dance korikena suru howah thakise. Tai khan pora dance kora toh warrior dance kora thakise. Hoilebe, time putli kora pora, maike khan toh moda laga next deh dance kora thakise. Ao tribe khan pora Hornbill dance kora toh hornbill bird deh honour kora laga ase. Aro etu toh valour, faithfulness aro noble disposition laga symbol mana laga ase. Chakasang tribe pora Kubo Lichi Kemhou Ketsu korise. Etu toh, notun kethi laga bhaat daiyar hoise khaabole aro kethi koribole laga din ponjise kowah laga ase. Change tribe khan pora Tongten Senbu (traditional log drum dana) dekhaideya thakise. Log drums toh ami khan laga baba-baba time hesab deh morung laga sobse kaam laga mani. Aro etu jola toh toh war pora jeta, natural hatsa howah aro manu mora laga khobor janaidebole time debe jolai. Tusara tribe khan pora be cultural show kora khan toh, Garo tribe (Wangla dance), Konyak group (Leaphet), Lotha group (EkhyoShari dance), Phom (Naü-ü Asho), Pochury cultural (folk dance Athso Theserie), Kachari cultural group (indigenous game Goda Jang Konsa Dobani), Rengma cultural group (Tefü Kethyü Lü), Sangtam tribe (Thsakuk nyinging), Sumi tribe (aphilo kuwo), Yimchunger tribe (Khuyh Achihkhi), Phanjang Village cultural group (Jangcha Lam dance) aro Zeliang cultural group (Herie Lim) thakise. Cultural programme laga host toh Minister for Health & Family Welfare, S. Pangnyu Phom aro Advisor, IT, S&T, NRE, Mmhonlumo Kikon thakise.
Kigwema Local ground deh Traditional Evening Park jai ase
19th Hornbill festival, Kisama jaga laga next deh Kigwema Youth Organisation pora Kigwema Local ground pora Traditional Evening Park olaise (organised) aro etu toh jai ase. Kigwema Youth Organisation pora suru kora laga main aim toh local handicrafts aro wild organic vegetables khan dekhai kena tourism industry othabole laga ase. Etu opor deh KYO pora be unemployed youths khan ke kaam koribole dekena human development othabole laga aim ase. Etu plan deh lowah toh state laga employment sal-sal deh nami thaga pora ase aro government pora sob lekha-pohra youth khan logode job debole naparibo, etu pora lowah ase koikena KYO President, Vibelie Sale pora janise. Tai pora traditional evening park toh hotai sal Hornbill festival laga part hesab deh lobole ase koikena janaise. Etu laga deh tai pora kowah toh, Hornbill festival othabo karni department pora para-tak motob debole janaise. Local delicacies, fast foods, fruits aro wild organic vegetables khan toh ase. Sob melikena 41 stalls toh 32 self help groups aro 5 khels logode ahhibole young entrepreneurs khan pora hotai park jolai.
Add Comment