New Delhi, February 11: Pop Singer Ed Sheeran tu ajikali tailaga India tour enjoy kuriasey. Recently, taikey famous Indian playback singer Arijit Singh logotey scooter ride enjoy kora dikhi thakisey. Etu National award pa singer(Arijit Singh) para Ed Sheeran ke tailaga thaka jaga Jiaganj (Mushidabad, West Bengal) te ekta scooter ride disey. Etu duijun para scooter ride kora laga ekta video internet te viral hoi asey. Ed Sheeran para tailaga security team charikina Arijit logotey scooter aro boat(nao) laga ride kurisey. Aro etu homoitey, taikhan ek-dusra logotey bhal homoi bitaisey.
Police para Bengaluru te Ed Sheeran laga street show ban kuridiya picheyte, Ed Sheeran ke West Bengal te Arijit Singh logotey dikhisey. West Bengal laga manu khan tu etu saikina asurit hoisey ki Ed Sheeran tu eku security nathakikina aram para berai asey.
Ed Sheeran aro Arijit Singh laga dosti tu bisi gehra asey. Taikhan duijun laga friendship tu September 2024 te London te ekta stage tee key logotey gana kora picheyte bisi tagra hoijaisey. Utu homoitey, taikhan duijun bi ek-dusra laga hit gana gaisey. Sources hisap te, Ed Sheeran para Jiaganj te 5 hours maan bitaisey, kuntu homoitey tai Arijit logotey scooter aro boat ride kurisey.
Bengaluru concert laga ageyte, Ed Sheeran para Church Street te ekta casual performance kurisey. Hoilebi police para tailaga show tu middle para rokhaidisey. Etu picheyte tai para tailaga concert te Shilpa Rao logotey Junior NTR laga Telugu gana ‘Chttamalle’ perform kurikina sob manu ke asurit kuridisey. Ed Sheeran para Hyderabad aro Chennai te duita concert kurisey aro etya tai February 12 te Shillong te aro Delhi-NCR te February 15 te perform kuribole asey.
Add Comment