Ministry of MSME, Government of India under te, MSME Development and Facilitation office, Dimapur para Department of Industries and Commerce and District Administration logotey milikina 13th February 2025 te PM Vishwakarma te ekta one-day awareness camp organize kurisey. Etu awareness camp tu Shamator laga under te Chessore Village Council Hall, Chessore te hoisey.
Etu session tu Chessore village laga Head GB, Throngkiuba Yimkhiung para ekta prayer kurikina suru hoisey. Etu picheyte village council chairman, Zhelo Yimkhiung para ekta welcome address disey.
Inspector of District Industries Centre, Tuensang, Thungdi Chang para audience ke etu scheme laga bari te guide kurisey aro information disey aro etu department laga under te suru kora alag alag scheme laga bari te kotha kurisey. Etu picheyte, State PMU, PM Vishwakarma para etu scheme te ekta presentation disey. Etu camp laga objective tu 3ta asey: etu scheme laga bari te manu khan ke janaidibole, busti ke PMV portal te anibole aro artisans(haath para ki ki saman bana manu khan) khan ke enroll kuribole.
Bisi artisans(haath para saman bana manu) khan para taikhan laga Aadhaar te correction kuribole nimitey bi apply kurisey. Jaiseki taikhan laga mobile number link kora, address change kora aro taikhan laga baba laga naam change kora. Etu PMV scheme under te, ekta artisan nimitey taikhan laga Aadhaar te details khan correct kuribole compulsory asey.
PM Vishwakarma Scheme ke Government of India para September 17, 2023 te launch kurisiley. Etu tu purana tarika cholaikina haath para saman bana manu khan kun khan ke eksath Vishwakarma koi taikhan ke support kuribole nimitey launch kurisiley. Etu scehme laga aim tu artisan khan ke taikhan laga kaam te taikhan laga skill improve kuribole laga asey, taikhan ke high quality training, behtar hathyar aro eku property nohoilebi saman khan girvi rakhibole nalagikina loan dikina.
Etu scehme laga under te identify kora 18 kaam khan tu Carpenter, Goldsmith(sona laga saman bana ), matti laga pot bana , Barber(chuli katta), Cobbler(jutta bana), murti bana, Kapra sila, Dhobi, Martool aro kaam kora hathyar bana, Tala-chabi bana aro repair kora, Pathor bhanga, Basket/Mat/Jharu bana nohoilebi coconut laga rusi para saman bana, Doll aro Khilona bana, Mala bana, Maas dhora jaali bana asey. Etya nimitey, Carpentry, Masonry(ita, pathor khan para saman bana) aro Tailoring(Kapra sila) laga kaam tu centre te rokhaidikina asey.
Add Comment