Seoul, February 16: South Korean actress Kim Sar-Ron tu 24 years laga umar te murijaisey. February 16 te, Korean media para report disey ki etu jawan actress tu Seoul laga Seongdong-gu te thaka tailaga ghor te murikina thaka paisey.
Kim tu Netflix laga show Bloodhounds te tailaga role nimitey jana jai. Tai juwa olop saal te camera nohoilebi show khan para dur thakisey.
Korea Hrald laga hisap te, Kim laga ekjun close friend para Kim laga ghor te tailaga deadbody paisey aro Sunday(February 16) laga 4:50-5:00 PM faley police ke khobor kuridisey. Police para koisey ki etu ghotna te ghor te joborjosti gusa nohoilebi sajish kora laga eku sign nai aro etya etu maut laga karon janibole nimitey investigation kuriasey.
Kim tu May 2022 te mudu khaikina gari chola laga ghotna nimitey headline te ahisiley, kuntu para tailaga career ke biya para affect kurisey. Tai tu nisa laga halat te gari cholaikina ekta electrical transformer te lagaidikina, utu jaga laga bijli bon kuridiya picheyte arrest hoisiley. Arrest huwa picheyte Kim para tailaga agency laga through bi aro haat para likha letter te bi maaf mangiisley. Tai para etu ghotna para affect huwa manu khan ke bi poisa teraisey. Aro etu terabole nimitey tai ekta café te part-time kaam kuri thakisey.
Kim para tailaga acting career tu baccha thaka time para suru kurisey aro A Brand New Life, The Man From Nowhere aro Bloodhounds nisna mashoor film para bisi recognition(pehchan) paisey.
Add Comment