Ahmedabad, February 26: Gujarat Police para Navsari te duijun minor(18 years nicheyte thaka) chokra ke taikhan laga sathi Rahul ke ekta purana jhagra ke loikina moraidiya nimitey arrest kurisey. Et purana jhagra tu Rahul laga dangor dada ke loikina thakisey.
Rahul, kun recently Uttar Pradesh para Gujarat laga Navsari te tailaga dada logotey buhibole ahisiley, tai tu murikina thaka paisey. Etu picheyte police para investigation suru kurisey. Police para etu janibole paisey ki tai tu muribole ageyte tailaga duijun sathi logotey thakisey. Jitya etu duijun sathi ke huda-hudi kurisey taikhan para etu jurum kurisey koikina confess kurisey.
Navsari Deputy SP BV Gohil para kuwa hisap te, Rahul laga dangor dada tu tai etu duijun sathi logotey rati-rati bahar jaithaka tu khusi pai thakanai. Aro ekbar taikhan ke Rahul para dur thakibole koikina taikhan ke gali disey aro lathi para bi marisey. Etu picheyte, etu duijun chokra tu almost dui moina Rahul para dur thakisey.
Rahul mora laga din te, etu duijun chokra tu achanak Rahul ke lok paisey. Aro taikhan ekey logotey golgappa kha picheyte, poila laga kotha olaikina jhagra kora suru hoisey. Gus uthikina, etu duijun sathi para Rahul laga math ate pathor para marisey. Aro etu picheyte Rahul para taikhan laga bari te complain kuribo koikina bhoi khaikina, taikhan para taikey moraidisey.
Etu duijun chokra para bhabna kurisey ki taikhan Rahul para bisi homoi dur thaka nimitey taikhan laga opor te kunbi suspect nukuribo. Aro taikha duijun tu taikhan laga normal kaam khan kurithakisey. Hoilebi, police para taikhan ke joldi identify kuriloisey aro arrest kurikina etu case ke olop ghonta bhitor te hey solve kuridisey.
Add Comment