Mumbai, February 28: Ekta dangor update te, gana laga lyrics aro poem likha mashoor manu Javed Akhtar aro actress Kangana Ranaut para 5-saal taak kanooni larayi kora picheyte taikhan laga majotey chulithaka lamba jhamila tu khotom kuridisey. Etu duijun bi ekta greement te pungchisey, kuntu picheyte Javed para Kangana laga khilaf te defamation(tailaga naam botnam kora) case file kora tu withdraw kuriloisey. Ekta court settlement te, Kangana Ranaut para maafi mangisey aro etu agreement laga terms(shart) ke swikar kurikina ekta high-profile kanooni larayi ke khotom kuridisey.
Etu picheyte Kangana Ranaut para Instagram te enaka likhisey, “Aji Javed ji aro ami para amikhan laga kanooni larayi tu khotom kuridisey, Javed ji tu bisi mon bhal thakisey aro morom dikhaisey, aro tai para ami para direct kuribole thaka next film nimitey gana likhibole bi monjur hoisey.”
Likhikina thaka settlement laga his ate, Kangana Ranaut para Javed Akhtar nimitey pura mon para respect janaisey aro tailaga kotha para Javed ke dukh pongchisey koikina bi manisey. Tai para dukh pongcha nmitey maafi mangisey aro koisey ki ahibole homoitey tai enaka kotha khan nokobo. Kangana para tai poila te ki-ki koisey etu khan sob wapas loisey aro Akhtar laga khilaf te kuwa sob kotha tu wapas lobole agree kurisey.
Etu agreement para etu duijun majotey chulithaka kanooni larayi ke khotom kuridisey.
Javed Akhtar aro Kangana Ranaut majotey etu jhamila tu 2020 te suru hoisey, jitya Kanagna para ekta interview te Javed laga khilaf te bisi dangor-dangor kotha koisey. Tai para enaka koisey ki Javed para taikey tai(Kangana) aro Hrithik majotey 2016 te public te khula-khuli ekdusra laga bari te biya kotha kuwa nimitey maaf mangibole pressurize kurisey. Kangana para koisey ki taikhan duijun lok kora homoitey Javed para judi tai tailaga kotha namanisey koiley etu laga natija biya hobo, taikey jail pathabo aro barbad kuridibo koikina koisey. Etu laga jawab te Javed para tailaga khilaf te defamation case file kurikina koisey ki Kangana laga kotha tu pura-puri misa asey. Aro tai para Kangana ke khali etu mamla te discuss kuribole hey matisey aro tai hunibole tayar nai koikina bujuja picheytey, tai para topic change kuridisey.
Add Comment