New Delhi, March 02: Bollywood actor Varun Dhawan tu etya bisi inatazar thaka film ‘Border 2’ laga shooting kora te busy asey. Etu film picheyte Varun tu tailaga baba David Dhawan logotey aro ekta romantic film nimitey haath milabole asey. Hoilebi etu film laga title etya tak bi decide huwanai.
‘Border’ film tu 1997 te release hoisiley aro etu ke manu khan para poson kurisey. Etya, JP Dutta tu Border laga second part te kaam kuriasey. Etu film te Sunny Deol, Varun Dhawan aro Diljit Dosanjh nisna actor asey. Actor Varun Dhawan, kun etu film te shamil asey, tai toh etya etu film laga next schedule laga shooting nimitey tayari kuriasey. Etu shooting tu Uttarakhand te hobole asey. Etu film laga shooting pura huwa picheyte, Varun ke South Indian actress Sreeleela logotey ekta romantic film te dikhibole asey.
David Dhawan para direct kuribole thaka, etu film tu Varun Dhawan taikhan duijun kora fourth film hobole asey. Etu ageyte taikhan duijun tu ‘Main Tera Hero’(2014), ‘Judwaa 2’(2017) aro ‘Coolie No. 1’(2020) te kaam kurisiley. Sreeleela tu etu film logotey tailaga Bollywood debut(entry) kuribole asey. Etu film te Mrunal Thakur aro Manish Paul bi asey. Etu film tu Mumbai, Goa aro dusra desh jaiseki London aro UK te bi shoot kuribole asey.
Etu film logotey jurikina thaka ekta source(khobor diya manu) para koisey ki etu team tu bisi bhak shooting London te bisi famous jaga khan te kuribole asey. Etu ekla nohoikina, etu film laga dance number bi etu jaga khan te shoot kuribole asey. Etu film laga shooting tu etu saal laga May moina para suru hobole asey.
Add Comment