Kiphire te 3rd Inter-Department Sports Meet chuliasey

Kiphire, march 13: Kiphire laga District Commissioner(DC), Temsuwati Longkumer para “Unity in Service, Strength in Solidarity” laga Theme under te 3^rd Inter- Departmental Sports Meet 2025 laga inauguration program attend kurisey. Etu event tu Officers’ Club, Kiphire para organise kurisey aro 14^th IRB Camp, Kiphire te 13^th March 2025 te hoisey.

DC para tailaga speech te koisey ki enaka event para alag-alag department te kaam kora manu khan ke eksath aney, taikhan kuntu position te thakisey koilebi aro ekta casual(relaxed) setting te ekjun-ekjun logotey kotha khan kuribole laga mohol banai. Tai para sob participant khan ke etu moka tu dosti banabole nimitey cholabole koisey, taki etu district laga bhalayi nimitey alag-alag department majotey coordination bhal thakibo.

Etu program te welcome address tu Kiphire laga DPO, Lipichem para disey aro Albert Jinger para specialnumber disey. Oath taking(kosom kha) tu Kiphire laga DFO Nzanthung para lead kurisey. Aro opening prayer tu 14^th NAP (IR) laga women pastor Khalila para kurisey.

Etu Inter-Departmental Tournament 2025 nimitey dui din karney department group hisap te bhak kora tu- Red Bull, Blue Zangki Warriors, Green Saramati Riders aro Yellow Mountain Kings thakisey. Etu event te alag alag sports jaiseki Badminton, Darts, Carom (Double), Tug of War aro Football Penalty Shootout thakibole asey.