Dimapur, March 13: 13th March 2025 te, Dimapur laga Toluvi te thaka ICM Hall te Small Cluster Development Programme (SCDP) laga under te Handloom Sector Support (HSS) items(bustu khan) jaiseki looms, accessories aro lighting units laga ekta Awareness & Distribution Programme rakhisiley.
Etu program ke Assistant Director (I&C) Er. Nungsanginla Longkumer para lead kurisey. Aro Darogajan Sumi Baptist Church laga Pastor Rev. Jehoto Yeptho para opening prayer kurisey.
Er. Asenla Walling, Executive Engineer (I&C) para tatey jama huwa manu khan ke etu scheme laga objective aro implement kora laga bari te jankari disey aro NHDP under te Special Cluster Development Programme (SCDP) laga bari te janaisey kuntu ke Development Commissioner (Handlooms) para fund kurisey. Etu laga aim tu Dimapur laga kapra bana manu khan ke overall develop kuribole laga asey. Etu scheme para 4ta busti ke cover korey- Baman Pukhri A, Baman Pukhri B, Darogajan aro Kushiabill. Aro enaka kurikina 200 opor kapra bana manu ke benefit kuriasey.
Etu programme laga under te, kapra bana manu khan para loom(kapra bana laga bustu), rame aro backstrap thaka wala, solar light, warping drums(sutta milabole aro thik kuribole laga drum) aro kapra bana laga kaam ke behtar banabole nimitey lagiya dusra bustu khan pabole asey. Etu program te skill training, saman banabole, nutun skill khan sikhibole pariya laga jaga visit kora aro kapra banabole jaga aro light nimitey poisa laga modod dibo. Etu scheme laga beneficiaries khan para taikhan laga naam dhala homoitey, Aadhar laga verification tu complete kuribo lagey. Etu subidha khan tu Tuesday para bhak kora suru hobo
SCDP laga launch te kotha kora homoitey MLA aro Industries & Commerce laga Advisor, Hekani Jakhalu para koisey ki etu initiative tu Nagaland laga kapra bana maiki khan laga hosla barabole nimitey ekta dangor effort dhala laga suruwat asey. Tai para koisey ki government laga kaam tu manu khan laga seva kuribole laga asey aro etu training aro saman khan distribute kurikina, government para kapra bana manu khan ke taikhan para nijor ke support kuribole nimitey lagiya skills logotey tayar rakhibole aim kuriasey.
Hekani para kapra bana manu khan ke request kurisey ki taikhan ke training aro saman khan dikina asey aro etya taikhan tu kapra laga design, quality aro dangor market te dusra logotey mukabala kuribole nimitey bikri kora laga taika improve kuribole te focus kuribole koisey.
Jakhalu para etu bi janaisey ki etu department tu ekta swaddle wrap design banabole aro made in Nagaland ke ekta unique brand banabole te kaam kuriasey. Tai para kapra bana manu khan ke etu opportunity nimitey tayar hoikina thakibole aro taikhan laga pura efforts dhalibole encourage kurisey. Tai para Dimapur laga kapra bana manu laga group para dusra group khan nimitey ekta example set kuribo koikina akha jataikina kapra bana manu khan ke taikhan ke support diya laga pura faida uthabole aro taikhan laga kaam ke nutun heights taak pungchabole koisey. HSS laga bustu khan bhak kora homoitey certificate khan bi bhak kurisey.
Etu event te, Weavers Service Centre, Dimapur laga Assistant Director aro HOO Sarbeswar Das aro Director of Industries & Commerce, P. Tokugha Sema para bi khata speech disey. Etu programme tu DIC Dimapur laga Functional Manager N. Abeno Patton para vote of thanks dikina khotom hoisey.
Add Comment