Yuki Bhambari para Rohan Bopanna ke India laga No.1 Men’s Doubles Player ranking para hataidisey

New Delhi, March 23: Yuki Bhambri aru tailaga Portugal partner Nuno Borges para Rohan Bopanna aru Croatia laga Ivan Dodig ke Miami Open laga round of 32 match te harai kena 6-4, 3-6, 10-7 para jitise. Indian tennis veteran Yuki Bhambri tu Sunday te Florida te Miami Open te Rohan Bopannake haraidiya picheyte India laga top tennis doubles player laga title paisey . 32 years laga Bhambri ke Association of Tennis Professionals (ATP) doubles rankings release huwa picheyte number one te dhalidibo, Olympics.com hesapte. Indo-Portugal laga pair(Bhambri aro Nuno Borges) tu next round of 16 te Czechia laga Adam Pavlasek aru United Kingdom laga Jamie Murray laga against te khilibole asey. Sunday te jitya picheyte Yuki Bhambri live ATP doubles rankings te number 29 te uthishe, aro Bopanna 43 te girijaisey. Duita Grand Slam champion aru 26 tour-level title winner, Bopanna tu Miami Open laga defending champion thakishe, kotey tai last year Matthew Ebden logotey jitisiley. 45 years laga Bopanna tu October 2019 para India laga number-one doubles player thakishe, hoilebi Bhambri para tailaga 286-week laga raaj ke khotom kuridisey. Bhambri tu bishi bhal form te ahikina asey, etu moina laga first faley Dubai Tennis Championships 2025 te Australia laga Alexei Popyrin logotey milikina tailaga sobsey first ATP 500 title jitise.” Bhambri aru Popyrin tu competition te picheyte thakikina jitisey, US Open aru Australian Open laga doubles champions Harri Heliovaara aru Henry Patten ke final te 3-6, 7-6(12), 10-8 para haraidikina. Bhambri aru Ivan bhi juwa moina te Qatar Open para top-seeds(top player) Marcelo Arevalo aru Mate Pavic ke hataidisey. Bhambri,  2009 Australian Open junior boys champion tu ekta homoitey India laga singles number one player bhi thakishe. Tai duibar men’s singles top 100 te uthishe, aru tailaga best ranking April 2018 te 83 thakishe,  2023 te doubles ke priority dibole decide nokora ageyte. Dubai Tennis Championships te success huwa picheyte, Bhambri para  250 level te tinta ATP title bhi jitise.