Miami, 29 March : Bishi fans jonno Cristiano Ronaldo aru Lionel Messi ekta team te ek sathe khelibo itu ekta dream thakibo pare. Itu hope aru barai kena, ketiaba news report te koi thakise ki Messi aru Ronaldo upcoming FIFA Club World Cup te Inter Miami jonno ek sathe khelibo pare. Report te kowa thakise ki Portugal aru Al Nassr laga superstar itu dangor tournament te kheli bole bishi interest ase, juntu June 14 pora July 13, 2025 tak USA te hobo. Kintu, football laga reliable journalist Fabrizio Romano ekta social media post te itu sob rumours pura dismiss kuri dise.
Inter Miami already 2025 Club World Cup jonno qualify kuri loijai dise. MLS Supporters Shield pichla season te jitikena, tai 32-team tournament jonno nijor jagah confirm kuri dise. Itu team Group A te ase, juntu majote FC Porto, SE Palmeiras aru Al Ahly FC ase. Saudi Pro League pora Al Hilal bhi itu tournament te khelibo ase.
Ketiaba age, TalkSport laga ekta report te kowa thakise ki Ronaldo ekta team jonno sign kuri bole interest ase, juntu FIFA Club World Cup te compete kuribo. Itu news ahibo piche speculation hoijai ki Inter Miami Ronaldo ke ekta short-term contract offer kuri bole pare, juntu pora tai Messi logot ekta team te kheli bole pau.
Ronaldo itu season laga last te free agent hoi jabo, karon tai laga current Al Nassr contract expire hoijabo. Tai Riyadh-based club te ahijon £3.18 million ekta hafta te pai thakise. Inter Miami, juntu England laga legend David Beckham laga club ase, Ronaldo laga salary afford kuribo pare hoilebi, reports hisab te Ronaldo Al Nassr logot thaki bole extend kuri lobole ase.
Ronaldo pichla te Club World Cup charibar kheli loijai dise, Manchester United aru Real Madrid jonno represent kuri kena. Tai tournament te total aathta match kheli kena saat goal aru tinta assist record kuri dise, aru juntu edition te kheli se sob te champion hoijai dise.
Messi jonno bhi itu tai laga fourth appearance hobo Club World Cup te. Barcelona jonno khelikena, Messi 2010, 2012 aru 2016 te itu tournament jitise. Tai total paanch match kheli kena paanch goal mari dise aru ekta assist kuri dise.
Add Comment