New Delhi, 05 April 2025: MHA (Ministry of Home Affairs) Kuki-Zo aru Meitei group khan laga joint meeting New Delhi te aji sham te lobo, jun tu etu duita community laga bhal aru shanti para last dui saal bitore te first time hobo.
Dui saal bitor te, sorkar laga joint meeting rakhibole Kuki-Zo aru Meitei group laga representative khan logote bar bar kosis kura toh succes hua nai. October 15, 2024 te MHA, Meitei aru Kuki-Zo MLAs khan logot te New Delhi te meeting kuribole dakise, Kuki-Zo MLAs khan meeting te ahibole manise kintu Meitei MLAs khan logote ekke room te kotha nakuribo koi se. Etu nimite MHA official khan alag alag meeting eke building bitore New Delhi te rakhibole opai loise.
Aru attah official laga kotha hissab te, attah influential Kuki-Zo group juntu Kuki-Zo Council, Hmar Inpi, COTU aru Zomi Council te ase, taikhan laga aath jon representative already Friday dinner shaam te Delhi punchise. Meitei group khan bhi Delhi punchise Friday din te, jun khan ke Federation of Civil Society Organisations aru All Manipur United Clubs Organisation represent kuribole ase.
“Meeting toh MHA laga North East advisor, AK Mishra, ministry official khan aru Intelligence Bureau laga official khan cholabo. Duita group khan ekathe bosi kotha kuribole rajih hoise. Taikhan ke age para koi dise ki meeting tu ekta joint meeting hobo. Jodi sob tik para jaile, etu ekta dangor step hobo normalcy wapas anibo karone. Komse kom taikhan ektha kotha kuribole acha kua toh, etu bhi dangor kotha ase,” koi se ekta official.
Lok Sabha te Union Home Minister Amit Shah Thursday din te reply kurina koi se ki sorkar Kuki aru Meitei group khan ke joint meeting rakhibole kosis kuri ase. Tai koi se, “Joldi joint meeting hobo. Ami kaam kurii ase joint meeting rakhibole.”
Etu ek din pichete, Shah Rajya Sabha te koi se ki budget session chola time te, duita alag meeting Kuki-Zo aru Meitei group logote loi se. “Ami sure ase ki ekta joint meeting duita group logote lobo New Delhi te,” koi se Friday din te jitiya Rajya Sabha te President’s Rule Manipur te aniya laga kotha discuss kuri thakise.
Meitei group laga prominent member aru FOCS laga president Manihar koi se, “Duita group pura choi jon representative, junte acting president bhi ase, Delhi punchise shanti kotha kuribole. MHA koi se ki ekta joint talk hobo alak community logote.”
Kuki-Zo Council laga president Henlianthang koi se, “Aath jon, doita doita Kuki-Zo-Hmar tribal group pora, Delhi punchise joint talk kuribole. Ami hoilebi time aru meeting laga jaiga jun tu hobo, jani diya nai.”
Prominent Meitei group COCOMI laga convenor Khuraijam Athouba koi se, “Ami meeting te najao. Delhi pora phone call ahise kintu ami najane etu authentic manu pura ase na nai. Ami joint meeting te najabo, karon sorkar Parliament te Manipur te juntu violence hoi ase, etu laga wrong cause present kuri se.”
Add Comment