New Delhi, 03 May 2025: Supreme Court Friday din ekta family ke, juntu choi jon ase, interim protection diya ase jate Pakistan ke deport na kuribo, aru document verify hobo tak time dishe. Court koise ke family laga Pakistani passport surrender kura aru Indian identity documents thaka claim ke verify kuribo lagibo.
Justices Surya Kant aru N Kotiswar Singh laga bench, specific time fix kuranai, authority khan ke koise ke identity documents; passport, Aadhaar card, PAN card, verify kuribo, aru relevant information consider kuribo.
Court koise, “Etu case laga situation special ase, tai authority khan kunuba strict step na lobole ekta decision loise. Jodi petitioners final decision te dissatisfied hoi, taikhan J&K&L High Court te appeal kuribo pare. Etu order ke precedent hisap te na lobo.”
Etu order to central government laga April 25 directive aha biche olob din poche ahise, juntu te koise ke Pakistani nationals ke diya visa April 27 para revoke kura hobo.
Petitioner Ahmed Tarek Butt koise ke tai ekjon Indian national ase, juntu laga valid Indian passport, Aadhaar card, voter ID aru alak Indian documents ase. Tai court ke koise ke tai laga family ke detain kurikena Wagah border loi jai ase deport kuribo karone.
Butt laga lawyer Nanda Kishore court ke koise ke Butt ke 1987 te India ahile visa diya hoise. Tai Pakistani passport surrender kurikena Indian passport loishe. Tai laga duita bacha Bengaluru te kaam kure, aru tai laga wife aru daughter Srinagar, Jammu and Kashmir te thake.
Court koise, “Petitioner laga factual claim to authority khan verify kuribo lage document genuine ase na nai, etu sob. Eku opinion nadi kena, petition dispose kuri ase, document aru information verify kuribole.”
Government laga lawyer, solicitor general Tushar Mehta koise ke etu family six jon India te visa expire hoa para rukhi ase. “Taikhan authority ke approach kuribole dibo. Moi etya eku objection na uthabo, kintu jodi kunuba manu India te overstay kure, to tai khan protection entitlement nai. Etu precedent na hobo lage.”
Petitioner laga lawyer koise ke “shocking” situation ase, valid Indian document thaka para bhi family ke dui din majot desh chari jabole koise. “Etu petition court ke urge kure ke amikhan laga life aru liberty protect kuribole. Amikhan ke India para ulaidibo ase, kintu amikhan Indian national ase. Moi laga Indian passport to revoke kura nai,” tai koise.
Court koise ke petitioner khan J&K High Court ke approach kurile bhal hobo, karon etu court bhal ase document verify kuribole. Order te koise, “Jodi petitioner final decision te satisfied na thake, taikhan liberty ase J&K High Court ke approach kuribole.”
Centre laga April 25 directive to April 22 te Pahalgam, Jammu and Kashmir te hua ekta terror attack karone diya hoise, juntu te 26 jon manu murise.
Add Comment