‘Sinners’  film pora $200 million pora peshi poisa ponishe

US, 11 May 2025: Ryan Coogler laga film ‘Sinners’ sob expectation bar kurikena box office te ekta dangor winner baise. Marvel laga ‘Thunderbolts’ release hoa ekta week pichete release hoilebi, etu horror drama US box office te slow hoa nai. ‘The Hollywood Reporter’ laga latest report hisap te, Michael B. Jordan act kura etu film fourth weekend te US domestic box office te $200 million cross kurise. Report te koise ki ‘Sinners’ Friday din logot North America te total $199.8 million collect kurise. Saturday te film $200 million cross kurise, jun tu Warner Bros, laga release karone ekta dangor box office milestone ase. Etu film ‘Captain America: Brave New World’ laga North America box office collection cross kuri dise, aru etiya ‘A Minecraft Movie’ pichete ase 2025 laga highest grossing movie te. ‘A Minecraft Movie’ $402 million domestic collection ase. Worldwide collection te, ‘A Minecraft Movie’ $900 million earn kurise aru olop olop para 1 billion mark reach kuribo lage ase. Comparison te, ‘Sinners’ etya tak $250.8 million earn kurise. Hailee Steinfeld aru Miles Caton bhi etu film te act kurise. ‘Sinners’ ekta horror film ase jun Jim Crow America laga racial segregation aru vampire lore milaikena banai se. Film release hoa te strong positive reviews pai se aru social media te bhi fans para dangor word of mouth support pai ase. Director Ryan Coogler ekta emotional open letter likhi kena fans khan ke thanks dise film ke support kura karone. Tai koise, “Amikhan hotai audience logot mon rakhi thakise, aru ekta deep responsibility feel kuri thakise apuni khan ke entertain aru move kuribole, jun cinema te possible ase…. Moi cinema te biswas kuri ase. Moi theatrical experience te biswas kuri ase. Moi biswas kuri ase etu society laga important pillar ase. Etu karone moi aru moi laga colleagues khan ami khan laga life dedicate kuri se etu craft te. Aupnikhan na ahile, amikhan etu sob naparibo,” koise. Pedro Pascal para loikena Tom Cruise tak, dangor Hollywood stars khan etu film ke praise kuri se aru makers khan ke success karone congratulate kuri dise.