U-17 Asian Wrestling C’ships: Indian women para overall title loishey

Vung Tau, Vietnam, 26 June : International stage te Indian wrestlers laga dangor performance continue kori thaka somoyte, Indian Under-17 Women’s Wrestling Team Under-17 Asian Wrestling Championships te Champion Team hisebe uthi aase. Itu championship Vung Tau, Vietnam te June 18 para 26, 2025 tak hobo dise.

Under-23 Women’s Wrestling Team laga Vietnam te Under-23 Senior Asian Wrestling Championship te jeet pichhe, Under-17 women wrestlers bhi dangor himmat, determination aru skill dekhaise, aru India laga winning momentum continue rakhibole parise.

Indian Women’s Team bisi weight category te dominate korise aru total 10 ta medal jitishe – 5 ta gold, 3 ta silver aru 2 ta bronze. Tai logot India 215 points loi Champion Trophy jitise. China dusra position te aase 151 points loi, aru Japan tisra position te aase 149 points loi.

43 kg category te Rachna ekdom powerful performance dikhai dise, junte ekjon strong Japanese opponent ke 9-0 score te harai gold medal jitise.

46 kg category te Rutuja qualification round te ekjon Japanese wrestler ke haraise aru final te Uzbek opponent ke 10-0 te harai gold medal loi aise.

Moni, 57 kg division te wrestle kori, semifinal te Japanese opponent ke 10-2 te haraise, aru final te Kazakh opponent logot 1-1 score te draw korile bhi, criteria te jeet paise aru gold medal jitise.

Tina Punia, 61 kg category te Japanese opponent ke quarterfinal te 10-0 te haraise. Kintu final te Kazakh wrestler logot tough fight te 3-3 score te draw hoise, criteria te haar pai silver medal loi aise.

65 kg category te Ashwani Vishnoi final te ekjon Chinese wrestler ke 2-0 score te harai India karone gold medal loi aise.

69 kg category te Manisha final match te Chinese opponent logot fight kori fall te jeet paise aru ekta aru gold medal India karone loi aise.

India laga itu dangor success upcoming generation laga mahila wrestlers laga talent aru preparation dikhai dise.

Women’s team laga jeet logot, Hardeep (110 kg) Greco-Roman style te gold medal jitise, juntu India laga wrestling te sob format te strength thaka dikhai dise.