Nagaland • Niuland

Niuland te International Day Against Drug Abuse and Illicit Trafficking manai she

8 months ago

Niuland, 26 June 2025: Niuland District Administration, milai kina Niuland Police, Social Welfare Department aru CAD Foundation logot, 26th June 2025 te International Day Against Drug Abuse and Illicit Trafficking Niuland Town Clock Tower te manai dishe. Etu program laka theme thakishe “Breaking the Chain: Prevention, Treatment, Recovery for All.”

Etu program laka main aim to hoishe ki manu khan ke drug abuse laka danger janai dibole aru eki logot te kam kuri kina etu drug problem toh rukh dibole janai dishe. Main speaker aru CAD Foundation laka Director, Limhathung Ezung koi dishe ki drug abuse laka chain bhangibole bishi important ase. Etu laka kaam to ekjon manu ekla pora naparibo, sob eki logot church, public leaders, parents, civil society aru government laka milai kina effort dibo lage. Ezung bhi janai dishe ki manu khan preventive measures, stigma hata bole aru awareness program bana bole upor jor dibo lage.

ACP Niuland, Nokin Longkumer bhi kotha kuri kina koishe ki drug aru narcotic problem aru illegal drug trafficking laka legal side upor te ki ki problem ase bujhai dishe. Tai koishe ki Nagaland ekta dangor jagah ase aru international border ase, tai pura control kuribole bishi difficult ase, aru resource aru time beshi loi. Kintu tai manu khan ke encourage kuri dishe ki sob manu khan active thakibole lage anti-drug fight te support dibo lage.

Dr. Rosemary, Medical Officer CHC Niuland te, Opioid Substitute Therapy (OST) laka upor te update dishe. Tai koishe ki Niuland district te bishi manu, 120 jon pora beshi, OST treatment aji tak loi ase. Tai department officials khan ki ki problem aru inconvenience face kuri ase, itu bhi janai dishe manu khan ke.

OST treatment loi thaka ekjon patient, Aviho Achumi bhi kotha kurishe etu program te. Tai nijor life experience share kuri dishe aru alak manu khan ke inspire kuri dishe ki bhal life choose kuribole lage drugs nahoi kina. Ekta special song bhi Amenli Yepthomi pora present kuri dishe, juntu program ke special kuri dishe.

Program to EAC Niuland, Vitoka Yepthomi pora chair kuri dishe aru vote of thanks bhi tai dishe. Pastor Kughavi Zhomi (SBAN) pora invocation pronounce kuri dishe aru Pastor Puloto Sheqi (NCRC Niuland) pora benediction pronounce kuri dishe.

Program to unity laka message logot aru Niuland ke drug-free society banai dibole hope logot khotom kuri dishe.