New Delhi, 3 June : Cricket laga drama khan etiya nisina common nohoi thaka time pora, Lagaan ekta simple cricket khel ke India cinema laga sabse emotional aru gripping kahani majot ekta bonaise. Etiya film tu 25 saal pura hobo thakia karone, Ashutosh Gowariker directed aru Aamir Khan star kora Lagaan itia theatre te release hobo. Makers khan recently re-release trailer ulaise aru fans khan bishi excited ase.
Budhbar din, Aamir Khan Productions ke Lagaan laga re-release trailer share kurise, juntu film theatre te ghuri ahibole tayari kurise.
Trailer tu saina fans khan purana yaad te ghurise. Comments section te fans khan excitement dikhaikina bhal kotha likhise.
2001 te release hoikina film tu dangor hit hoise. Khali box office te nohoi, Academy Award for Best Foreign Language Film nomination bhi paisey. Itu logote, 49th National Film Awards te Lagaan aath-ta award jitise, itu majot Best Popular Film Providing Wholesome Entertainment award bhi ase.
1893 saal te, British raj laga late Victorian era te set kora itu film te central India laga kunba bosti manuh laga kahani ase. Bishi tax aru lamba din khora thaka karone taikhan bishi dukh pai thakise. Taikhan ke ekta British Army officer para taikhan ke cricket khilibole challenge dise. Jodi bosti manuh jite, itu hoile tax maaf hobo. Cricket najana manuh khan khel sikhibole lage aru dangor challenge khan paar kurikina jitisey.
Lagaan: Once Upon a Time in India 2001 te release hoise. Film tu Ashutosh Gowariker direct kurise aru Aamir Khan lead role te ase. Cast majot Gracy Singh, Rachel Shelley, Paul Blackthorne, Suhasini Mulay, Kulbhushan Kharbanda, Raghubir Yadav, A. K. Hangal aru aro bishi actor ase.
Film laga music A. R. Rahman compose kurise. Ghanan Ghanan, Mitwa, Radha Kaise Na Jale aru O Rey Chhori nisina gaan khan aji bhi manuhor mon te ase. Film tu June 12, 13 aru 14 tarik te theatre te ghuri ahibo.
