Mumbai, 3 June : Bollywood actor Aamir Khan joldi tai laga tisra shaadi koribo. Report hisab te, actor July mahina te tai laga girlfriend Gauri Spratt logot shaadi koribo. Budhbar din Hauterrfly laga Instagram post te etu khobor ulai dise. Shaadi tu July te hobo aru ekdom private aru intimate function hobo.
Report te koise ki Aamir aru Gauri bishi private shaadi koribo. July 5 tarik te duijon laga family members aru olop najik laga saathi khan matro ceremony te thakibo.
Couple khan dangor shaadi function nakoribo. Ghor te simple signing ceremony korina shaadi koribo.
April mahina te Navbharat Times logot interview te Aamir nijor personal life laga kotha pati thakise aru Gauri logot tai laga relationship bhi khuli kotha koise.
Pichla saal March mahina te tai laga 60th birthday din Aamir ke Mumbai te media logot Gauri Spratt ke introduce kori dise. Itu homoi pora taikhan ke bishi event te eki logot dikha jaise.
Aamir Khan tai laga first wife Reena Dutta logot 2002 te alag hoise. Reena logot tai laga duita santan ase — Junaid aru Ira. Itu pichete director Kiran Rao logot 2005 te shaadi hoise, kintu 2021 te duijon alag hoi jaise. Taikhan nijor beta Azad ke eki logot raise kori ase.
Pichla saal, 2022 te Laal Singh Chaddha flop hua pichete, Aamir Sitaare Zameen Par logot big screen te comeback kurise. Itu logote, Happy Patel: Khatarnak Jasoos filmot cameo role te bhi dikha jaise.
Etiya Aamir tai laga production film Ek Din release hua rukhi ase. Sunil Pandey direct kuria itu romantic drama te Aamir laga beta Junaid Khan aru actress Sai Pallavi lead role te ase. Film tu 2016 Thai film One Day laga remake ase. Film tu May 1 tarik te theatre te release hobo kuina schedule kora ase.
