Singapore, 23 October : Bollywood actor Aamir Khan Singapore International Film Festival te nijor career aru personal life laga kotha koi thaka homoi emotional hoise. 22 October event te tai Screen Icon Award paishe, juntu Hong Kong laga filmmaker Peter Chan Ho sun tai ke dise. Pichete ekta discussion session te Aamir koise ki tai bishi saal dhori kaam te iman busy thakise ki nijor family aru relationship karone time ulabo para nai.
Tai koise ki COVID 19 pandemic homoi te nijor life loi bhabibole time paishe. Tai bujise ki lagatar 30 saal kaam kori thaka karone tai laga lora suwali dangor hoise, aru tai nijor family logot important time miss korise. Itu kotha koi thaka homoi tai kandibole dhorise aru audience ke maaf mangise. Aamir koise ki etiya pichla char saal pora tai family aru close friends karone bishi time ulai ase.
