Aizawl, October 16 : Northeast te taikhan laga base barabole laga kosis te, Aam Admi Party (AAP) para Mizoram te November 7 te hobole thaka election te bhag lobole faisla kurisey.
AAP laga Northeast in-charge, Rajesh Sharma para Monday din te New Delhi te media ke jankari dithaka homoitey koisey, “ Hoilebi AAP para Mizoram te kiman seat te contest kuribole asey etu tu joldi announce kuridibo.”
Sharma para koisey, “ Juwa kali, AAP laga national convenor, Arvind Kejriwal laga chairmanship laga under te ekta meeting rakha homoitey etu organization ke barabole laga faisla aro Northeast laga rajya khan te election contest kuribole laga faisla loisey. Taikhan laga organization ke dangor kuribole nimitey, ekta coordination committee aro ekta Northeast cell banabole asey.”
Sharma para koisey ki Northeast laga manu khan tu pora likha, ilaj, saman khan laga daam utha aro naukri napa nisna bisi alag alag jhamila para dukh paikina asey aro taikhan para biswas kuri asey ki AAP para etu problem khan laga solution dibo paribo.
Sharma para koisey, “Dimag te etu iccha rakhikina etu party para enaka kuribole laga faisla loisey.”
Etu event te, AAP laga Nagaland state convenor, Asu Keyho aro Tripura laga assistant-in-charge, Abuzam Umapada Luwang bi mojud thakisey.
Sharma para koisey, “ Juwa kali Arvind Kejriwal logotey ekta meeting kora homoitey northeast rajya temanu khan para alag alag diktar jhela laga opor te aro ahibole thaka election te AAP laga organization ke barabole laga mamla te bi lamba discussion kurisey. Etu meeting kuri thaka homoitey taikhan para etu faisla loisey ki AAP para northeast te taikhna laga organization barabole nimitey, Northeast Coordination Committee banabole asey.”
Etu opor te, AAP leader para janaisey ki etu party para Northeast laga manu khan nimitey ekta Northeast cell banabole faisla loisey.
Etu opor te, AAP para bi ahibole thaka Mizoram assembly election te bhag lobole asey.
AAP laga Northeast in charge para koisey ki resource eman nathaka jaga Northeast te organization banabole aro election khan te bhag lobole laga kaam tu muskil laga asey.
Tai para koisey, “ Northeast laga rajya khan te, Chief Minister para taikhan laga rajya ke taikhan parivar laga zameen nisna treat korey aro sarkari contract khan bi taikhan laga family member aro friend khan ke di diye. Northeast rajya laga sarkari school, hospital aro rasta khan bi biya condition te asey aro samna khan laga daam tu barijai asey. Naukri napa tu ekta dangor problem asey.”
Sharma para agey barikina koisey ki Northeast laga manu khan para etu biswas kuri asey ki khali AAP para hey etu kaam khan pura kuribo paribo.
Add Comment