Imphal, January 3 : Manipur te larayi jhagra bari thaka homoitey Chief Minister N. Biren Singh para ekta kara warning issue kurisey ki judi Armed Forces (Special Powers) Act (AFSPA) ke rajya te wapas lagu kuriey koiley larayi jhagra ke baraidiya manu khan ke dhuribo.
Etu CM para olop din ageyte hoi thaka ghotna khan laga opor te tailaga gehra dukh jataisey khas kurikina Thoubal district laga Lilong Chingjao area te firing huwa laga ghotna kuntu te ban hoikina thaka Revolutionary People’s Front (RPF) laga cadres khan para 4jun busti manu ke moraidisey. Etu RPF tu ban hoikina thaka People’s Liberation Army (PLA) laga rajneetik wing asey.
Manipur laga Chief Minister para jokhom kha manu khan ke Raj Medicity te visit kurisy aro ekta video message te etu gondogol huwa ke condemn kurisey aro Lilong laga manu khan ke shanty tu banaikina rakhibole request kurisey. Tai para samjhaisey ki sarkar para kanoon ke namikina chola tu bardash kuribo naparey aro kun manu khan para nijor laga haath te kanoon lobole bisarey taikhan tu sarkar para luwa kara measure khan nimitey zimidar hobo. Aro etu te AFSPA ke aro wapas lagu kora bis hamil asey. Etu act ke juwa saal laga October moina para loikina rajya laga pahari area khan te 6 moina nimitey baraidisey aro kunba area khan tu ekdam dangor larayi jhagra huwa laga bawajut bi etu AFSPA act lagu huwanai.
Biren Singh laga etu bayan tu lagatar bisi larayi jhagra khan hoithaka picheyte ahisey kuntu te India-Myanmar border osor te thaka Moreh town te bunduk mara mari huwa bi shamil thakisey kuntu te bisi security personnel khan jokhom hoisey. CM para etu safa safi koisey ki sarkar tu nyay anibole nimitey lagatar kaam kuri asey aro etu gondogol khan te shamil thaka mujrim khan ke dhuribole nimitey talashi suru kuridisey. Tai para public khan ke bi eku shaak thaka laga kaam khan huwa dikhisey koiley report kurikina authority khan ke modod kuribole aro rajya laga bhitor te larayi jhagra kora bodli Manipur laga dushman khan laga khilaf te ekjut hoikina khara kuribole koisey.
Manipur laga situation tu etya bi gorom hoikina thaki asey aro sarkar laga jawab para rajya laga beybosta ke wapas anibole laga josh aro larayi jhagra ke khotom kuribole nimitey lagisey koile AFSPA nisna kara kanoon khan lagu kuribole laga sambhawna bi asey koikina dikhai asey.
Add Comment