Itanagar, January 3 : Itanagar seher tu aha juwa kuribole diktar pa laga mushkil jheli asey. Bharatiya Nyaya (Second) Sanhita, 2023 te olop din ageyte bodli ana laga khilaf te driver khan para pura deshbhor te strike kurithaka homoitey 3ta dangor petrol pump bon hoijaisey.
Etu strike ke ekta ‘hit-and-run’(gari para marikina polaija laga) case te jail laga sajai baraidiya laga faisla te khusi napa nimitey suru hoisey.
Truck chola manu, private bus chola manu aro sarkari bus driver khan etu protest te join hoijaisey aro behes kurisey ki etu nutun nyom hisap te taikhan ke accident huwa nimitey misa misi unfair para sajai dibo aro etu accident khan tu bisi bhak taikhan para control kuribole napara mamla nimitey hoi. Taikhan para koisey ki gusa uthikina thaka manu nohoilebi bhir khan para larayi jhagra kuribole laga dhomki diya para taikhan ke etu jaga para polabole majbur kuridiye aro enaka kurikina najanikina ‘hit and run’ (marikina polaija) laga scenario banaidiye.
Taikhan laga kamayi kora te asar huwa laga opor te chinta jataikina driver khan para behes kurisey ki kara kadam utha para taikhan ke discourage kuribo aro taikhan laga naukri laga naukri haraijabole laga bhoi humaidibo. Taikhan para fog ola homoitey accident bhal para dikhibole napara nimitey accident hoithaka laga mamla khan highlight korey aro koisey ki driver khan ke taikhan laga control laga bahar te thaka mamla khan nimitey jail te dhalibo nalagey.
Etu strike laga natija para transport system ke muskil te dhali disey aro passenger khan tu alag alag seher laga bus station khan te fasikina thakisey. Khas kurikina Itanagar seher tu fuel laga kami para dukh paikina asey kilemaney 3ta petrol pump khan tu bon hoijaisey. Social media laga report khan para dikhaisey ki taxi driver khan bi kunba rajya khan te etu protest join kurisey aro etu deshbhor te huwa strike laga asar ke aro bisi baraidisey.
Add Comment