Americans nemite coronavirus vaccine free pabo

Washington, United States: August 14, 2020. Joti COVID-19 vaccine tuh bhal para olaile, US para Americans manuh logot free para thibo koikena Thursday din officials para janai thishe. Aro safety nemite shortcuts nathakibo. Senior health department official para reporters logot koishe ke, “ami khan kam komti nakorikena saiase aro besas ase ke vaccines tuh olabo”. Washington para choita(6) vaccine project te $10 billion oper poisa thalikena ase aro contracts signed kora te clinical trials beche hundreds millions tawai paboli besas ase. Vaccine laga korcha tuh government para thibo koishe. Doctors aro clinics khan para saa laga tham tuh thibo hoilebi etu korcha tuh private aro public insurers khan para derai thibo. Mango para koishe ke, “besi wala commercial insurer khan para customers khan laga korcha tuh tai khan laga pocket para deraboli manishe”. “ami khan January 2021 saal para hundred millions tawai tuh thiboli ase ase” tai koishe. Director of the National Institutes of Health (NIH), Francis Collins para koishe ke, choita(6) vaccines pithor te ekta tuh hoile etu saal te vaccine tuh olabo koishe. President Donald Trump laga bhapana tuh November 3 darik election nalowah agea te oshari kam tuh hataikena vaccine ola tuh juna thiboli ase kotha tuh Mango para nahoi koishe. Etu hafta, Russia para last phase laga clinical trials be naloikena vaccine olai thishe, etu samay vaccine tuh bhal aro safety sabo nemite tens thousands volunteers khan logot tawai tuh thishe koishe. “ami laga bhapana te Russian para vaccine tuh safe aro bhal ase koishe, hoilebi, ami logot olop doubt ase,” koikena United States bemari laga official Anthony Fauci para National Geographic para virtual panel thaka samay koishe.