Amit Shah para Jammu & Kashmir te BJP Manifesto release kurisey

New Delhi, September 06 : Union home minister Amit Shah para Jammu & Kashmir laga dui din visit kora homoitey, Friday din te Bharatiya Janata Party (BJP) laga poll campaign ke etu party laga manifesto(election jitisey koiley ki-ki kuribo etu likhikina thaka statement) release kurikina launch kurisey. BJP tu taikhan laga party majotey  jhamila face kuri asey. BJP party laga member khan tu assembly election laga ageyte ticket bhak kora ke loikina protest kuri asey. Amit Shah para Jammu & Kashmir visit kora para  tatey BJP majotey ticket bhak kora ke loikina khusi napaikina thaka picheyte ahibole thaka barbadi ke control kuribole laga kosis te modod kuribole akha kuri asey. Jammu & Kashmir te election tu 10 saal picheyte hoi asey. Jammu district, te 11 assembly constituency asey aro etu  tu BJP nimitey important asey. 2014 laga election te BJP para etu 11 assembly constituency majotey 9 seat jitisiley, kuntu tu taikhan para Jammu & Kashmir te pa 25 seat te ekta dangor contribution thakisey. Jammu te Amit Shah ahibole ageyte, security tight kuridisey. Duita jaga te multi-tier security dhalisey. Kuntu majotey ekta  jaga tu  Channi area te thaka ekta hotel te BJP para  bana ekta media centre asey. Amit Shah para tailaga party members khan ke bhasan diya homoitey enaka koisey, “Independence pa homoi para loikina, Jammu and Kashmir laga mamla tu amikhan laga party nimitey important hoikina thakisey. Aro amikhan para hodai etu jaga ke India logotey rakhibole kosis kurisey. Pandit Prem Nath Dogra para etu nimitey larayi kora para loikina Syama Prasad Mookerjee para sacrifice kora tak, etu laga larayi ke  first tu Jana Sangh para para agey baraisileyy aro etu picheyte BJP para agey baraisey, Kilemaney amikhan etu maney ki Jammu and Kashmir tu poila para India laga hisa thakisey aro hodai India laga hisa thakibo.”