Amitabh Bachchan laga nakal kora actor Firoz Khan etu duniya te nathaka hoisey

New Delhi, May 23 : Actor Firoz Khan, kunke Amitabh Bachchan laga nakal kora nimitey janajai tai tu heart attack paikina murisey. India TV para report kurisey ki tai tu Thursday(May 23) te Uttar Pradesh laga Badaun jaga te murijaisey. Tailaga ekjun sathi para bi Instagram te etu news confirm kurisey. Shah Rukh Khan laga nakal kora nimitey jana ja Durga Rahikwar para Instagram te Firoz murija laga khobor share kurikina likhisey, “Aji amikhan laga majotey Feroz Khan bhaijaan(Jr. Amitabh Bachchan) nai hoisey.” Tai para ekta purana picture bi share kurisey kuntu te tai aro Firoz Kapil Sharma logotey ekta show te pose kora dikhaisey. India TV para report diya te koisey ki Firoz tu olop homoi nimitey Badaun te thakisey aro tai events khan te bi bhak loi thakisey. Tai social media nimitey bi reels banaikina busy thakisey. Tailaga akhri performance tu May 4 te Badaun Club te Voter Mahotsav te thakisey. Kotey tai Amitabh nisna kapra pindikina audience khan ke entertain kurisiley. Firoz te bury kora laga ceremony tu Badaun te hobole asey. Firoz tu Amitabh laga nakal kurikina tai nisna kotha kora nimitey jana jai thakisey. Hoilebi tai tu TV show, Bhabi Ji Ghar Pe Hai para mashoor hoisey.  Tai Jija Ji Chhat Par Hai, Saheb Bibi Aur Boss, Happu Ki Ultan Paltan aro Shaktimaan nisna TV show te bi kaam kurisiley. Firoz tu Adnan Sami laga superhit gana Thodi Si Tu Lift Kara De te bi thakisey. Tai muribole ekdin ageyte, Wednesday din te tailaga instagram te ekta reel share kurisiley, kotey tai Coolie film para Amitabh nisna dress pindikina thaksiey.