Guwahati, October 24 : Defence Minister Rajnah Singh para Tuesday (October 24) te Arunachal Pradesh laga forward post(border laga ekdam osor haka jaga) khan te visit kurisey aro tatey Armed Forces khan operation kuribole nimitey kiman tayar asey etu check kurisey.
Etu Defence Minister para Line of Actual Control (LAC) fale thaka frontline jaga khan te duty te dhalikina thaka sipahi khan logotey bi baat-chit kurisey aro taikhan logotey Dussehra manaisey.
Etu Defence Minister para muskil condition te border khan te duty te dhalidiya utu sipahi khan laga kitya bi haar namana laga josh, majboot thaka commitment aro taikhan ke kun para bi match kuribole napara laga bahaduri thaka nimitey aro hodai desh aro desh laga manu khan ke suraksit rakhibole kosis kora nimitey dhanyabad janaisey.
Tai para koisey, pura desh para Sipahi khan laga opor te garv kurikina asey aro taikhan logotey khara kurikina asey.
Minister Rajnath Singh para Tawang te etu sipahi khan laga team logotey Shastra Puja bi kurisey, kotey tai para etu kotha yaad kurikina koisey ki Dussehra tu biya laga opor te bhal laga jeet huwa tu dikhai.
Tai para etu point out kurikina koisey ki Indian Army khan laga bahaduri aro dil aro jaan para kaam kora tu ekta asol karon asey kuntu nimitey international(duniya laga) stage te India laga kadh barisey aro India tu etya sobsey bisi shaktishali desh majotey ekta asey.
Tai para olop din ageyte Italy te tour kora laga kahani koikina tai para koisey ki tai tu Italy laga Perugia jag ate thaka Montone memorial ke visit kuribole jaisey kuntu ke World War II te Montone ke dushman laga changul para azad kuribole nimitey Italian khan laga saath dikina larayi kora India laga Naik Yashwant Ghadge aro alag Indian sipahi khan laga contribution ke somman dibole nimitey banaisey.
Tai para koisey, khali Indian khan hey nohoikina, Italy laga manu khan para bi etu memorial te, taikhan laga respect di asey kuntu para etu proof kuri asey ki Indian sipahi khan laga bahaduri tu pura duniya te recognize hoikina asey.
Tai para Tawang War Memorial ke bi visit kurisey kotey tai para ekta cemetery te mala dhalisey aro 1962 te te India aro China majotey war huwa homoitey dangor sacrifice kora bahadur manu khan ke somman disey. Tai logotey Army Staff laga Chief General Manoj Pande, General Officer Commanding-in Chief Eastern Command Lieutenanat General Rana Pratap Kalita, General Officer Commanding 4Corps Lieutenanat General Manish Erry aro Indian Army laga alag senior officer khan bi thakisey.
Add Comment