Aizawl, October 25 : Mizoram assembly poll te bhak lobole thaka total 174 candidate majotey komsikom 64.4% candidate laga dhon Rs 1 crore para bisi asey koikina declare kurisey.
Etu candidate khan para affidavits diya hisap te, komsikom 112 maan candidate tu crorepati asey. Etu number tu 2018 te assembly election te bhag luwa crore pati candidate khan laga number para bi bisi asey.
Etu sob candidate laga dhon tu milaikina total Rs 65.93 crore maan asey. Aro etu majotey Aizawl North-III jaga para election khilibole thaka Aam Aadmi Party (AAP) laga president Andrew Lalremkima Pachuau tu sobsey bisi amir asey. Etu picheyte next te Serchhip jaga laga seat para election laribole thaka Congress laga neta R. Vanlaltluanga asey kun laga Rs 55.6 crore laga dhon asey aro Champai North para Zoram people’s Movement (ZPM) laga H. Ginzalala asey kun laga dhon Rs 36.9 crore asey.
Election Commission website te affidavit upload kora te, Lawngtlai West laga BJP nominee JB Rualchhinga para golti para tailaga dhon ke Rs 90.32 crore declare kurisey.
BJP para election department ke etu ke thik kuribole koisey.
Sobsey amir candidate, Aam Admi Party (AAP) laga president Andrew Lalremkima Pachuau tu ekta businessman asey aro tailaga maiki para Rs 93.47 lakh laga movable asset aro Rs 65 crore laga immovable asset declare kurisey.
Tai eku dhar bukhikina nai aro tailaga income tu business kora para ahey.
Congress candidate R Vanlaltluanga kun Serchhip jaga para election laribole thaka 6jun candidate majotey ekjun asey tai para tailaga maiki aro 3jun depend kora manu logotey milikina Rs 3.83 crore laga moveable dhon aro Rs 51.8 crore laga immovable dhon declare kurisey.
ZPM laga H Ginzalala logotey Rs. 17.19 crore laga moveable dhon aro Rs 18.9 crore laga immovable dhon asey.
Vanlaltluanga logotey kun ke bi terabole laga eku dhar nai hoilebi Ginzalala para tailaga dhon para 22.86 lakh poisa terabole asey. Taikhan duijun para bi etu dhon tu business kurikina kamaisey.
Serchhip seat para Ramhlun-Edena koikina ekjun independent candidate tu sobsey bisi gorib asey. Tai logotey Rs 1,500 laga moveable dhon asey.
2018 laga election te Hachhek jaga laga Mizo National Front (MNF) nominee Lalrinenga Sailo tu Rs 100 crore dhon thakikina sobsey amir candidiate thakisey. Tailaga nest te Aizawl East-II laga seat para MNF laga Robert Romawia Royte tu Rs 44 crore laga dhon logotey second amir candidate thakisey.
Hoilebi etu bar Sailo laga dhon tu ekdam bisi girijaikina Rs 26.24 crore hoijaisey aro Royte laga 32.24 crore hoijaisey.
16 maiki candidate majotey, Lunglei South seat para Congress nominee Meriam L. Hrangchal tu Rs 18.63 crore dhon thakikina sobsey amir candidate asey.
Sobsey amir candidate Andrew laga alava, Chief Minister Zoramthanga kun MNF laga president asey tai para Rs 5 crore laga dhon declare kurisey aro election te bhak lobole thaka 5ta rajneetik party laga president majotey sobsey amir wala asey.
Mizoram laga 40-member assembly te election tu November 7 te hobole asey aro vote laga ginti tu December 3 te hobole asey.
Add Comment