Guwahati, November 5 : United Liberation Front of Asom (Indpendent) (ULFA-I) laga 9ta cadre laga ekta group para October 18, 2023 te Assam laga Tinsukia district te ekta abduction mission(manu ke kidnap nohoilebi abharan kora laga mission) te jabole nimitey taikhan laga camp para olaisey.
Ekjun police official para koisey ki etu group ke abharan kora laga kaam tu Mriganga Asom , ULFA-I laga area commander aro Nabajit Asom ULFA-I laga second-in-command para disey.
Hoilebi etu group laga duijun ULFA-I cadre, Polash Moran (kunkey Gopal Asom koikina bi matey) aro Kolang Moran (Kunkey Latest Asom koikina bi janey) taikhan para etu mission ke chariidbole aro police laga ageyte surrender kuribole faisla kurisey.
Police official para kuwa hisap te, Polash Moran para November 1 te surrender kurisey. Aro Kulang Moran, kun ke Area Commander Mringanko Asom para Polash Moran ke bisarikina olabole laga zimidari disey tai para November 4 te surrender kurisey.
Surrender kora cadre khan ke puch tach kora picheyte etu janibole parisey ki ULFA-I laga sixteen member thaka group para taikhan laga camp tu ekta mission te jabole karney charisiley.
ULFA-I laga police ke surrender kora duijun cadre para jankari diya hisap te, police para taikhan laga area ke kapja kora laga operation suru kurisey aro utu area te katra te thaka manu khan laga security ke review kuri asey.
Puch-tach kora picheyte, police para 6ta AK rifle, ekta HK rifle, 20 shell thaka ekta grenade(chutu bomb) launcher, ekta pistol aro ekta haath laga grenade(chutu bomb) paisey.
Police para pa hathyar khan tu utu ULFA(I) cadre khan laga asey koikina mani asey kun khan para etu abharan kora laga mission te olaisey.
Add Comment