Imphal, November 5 : Kanoon aro beybosta ke maintain kuribole nimitey aro galat jankari aro ghing lagiya laga kotha khan ke feilibole para rokhabole nimitey, Manipur laga sarkar para rajya te mobile internet aro data service khan aro suspend(bon kurikina rakha) kora aro VPN para chola data service khan bon bi bon kurikina rakha laga homoi tu aro baraidisey. Etu faisla tu ekta official order laga through para announce kurisiley aro etu tu rajya laga bisi jaga khan te aji kali gondogol bari thaka laga jawab te kurisey.
Internet service bon kurikina thaka tu first September 6, 2023 para suru hoisey aro etu picheyte etu internet bon kora tu extend kurikina jai thakisey. Aji(November 5) te ailan kora internet ban tu November 8, 2023 tak thakibole asey.
Manipur Home Department para aha official statement para social media(whatsapp, instagram, facebook, X ) khan ke photo khan spread kuribole, manu ke nafrat koraiidya laga kotha aro video khan share kuribole nimitey galat istamal kuribole parey koikina chinta janaisey kuntu para public laga junoon ke baraidibo parey aro agey barikina Manipur te already gorom hoikina thaka nyom aro beybosta laga situation ke biya kuridibo parey. Etu opor te, sarkar para manu khan laga jaan ja aro property khan barbad hoija laga bi chinta jataisey. Aro social media aro message kora laga service khan cholaikina gusa uthaidiya laga bustu aro galat khobor khan spread kurikina public laga shanty aro alag alag jati milijulikina thaka ke biya kuridibo parey.
Internet ban baraidiya tu aro extra 3 din tak chulibole asey. Sunday (November 5) para suru hoikina November 8, 2023 laga 07 :45 pm tak chulibole asey. Etu homoitey, rajya laga sarkar para utu district headquarter khan te mobile tower aro wapas khulibole laga possibility bisari asey kuntu para etya nyom aro beybosta laga jhamila chuli thaka homoitey eku gondogol experience koranai. Judi etu kosis kamyab sabit hoisey koiley, alag situation behtar hoikina thaka area khan te bi etu tarika cholabo parey .
Add Comment