Assam CM : Chakma-Hajong khan ke Arunachal para Assam te relocate kuribole laga eku plan nai

Guwahati, April 23 : Assam laga Chief Minister Himanta Biswa Sarma para koisey ki Arunachal Pradesh te boha Chakma aro Hajong refugee khan ke Assam te anibole laga mamla te eku plan nohoilebi discussion koranai. CM Himanta Biswa Sarma para kosiey, “Arunachal Pradesh te, Chakma aro Hajong refugee khan ke Assam te anibole laga eku discussion koranai.” Hoilebi, etu Assam CM para koisey ki Arunachal Pradesh laga government logotey Arunachal te boha Moran aro Muttock community laga manu khan ke citizenship dibole laga mamla te discussion kurisey.  Tai para enaka kosiey, “Amikhan tu khali Arunachal Pradesh te boha Muttock aro Moran manu khan ke citizenship dibole laga kotha hey kurisey.” Tai para etu kotha tu Arunachal Pradesh laga union minister aro Lok Sabha MP Kiren Rijiju para ekta statement diya te react kurikina koisey. Kiren Rijiju para koisey ki Chakma aro Hajong refugee khan tu citizenship amendment act (CAA) laga under te Indian citizenship nimitey eligible hobole ageyte taikhan ke Arunachal Pradesh laga bahar te thakibo dibo lagey. Kiren Rijiju para suggest kurisey ki Arunachal te boha 67,000 opor Hajong aro Chakma community laga manu khan ke Assam te pathaidibo lagey.  Rijiju para koisey, “Taikhan tu yatey aluhi nisna buhi asey. Taikhan tu Arunachal Pradehs te permanent resident certificate (PRC) nohoilebi citizenship pabole eligible nohoi.” Tai para koisey ki Assam Chief Minister para Arunachal Pradesh laga government logotey baat-chit kurikina Chakma aro Hajong ke Assam te anibole bhabna kurisey. Union minister para koisey, “Amikhan tu Assam Chief Minister Himanta Biswa Sarma logotey Chakma khan ke Assam te wapas pathabole laga mamla te discussion kruisey.” Etu majotey, Assam laga opposition MLA Akhil Gogoi para rajya  te Arunachal Pradesh laga Chakma aro Hajong community laga manu khan ke Assam te buhibole dibole laga mamla te BJP lag akhilaf tea was uthaisey.