Regional

Assam CM : Election homoitey amikhan ke Rahul Gandhi laga jarurat asey

January 26, 2024

Guwahati, January 25 : Assam laga Chief Minister Himanta Biswa Sarma para Thursday (January 25) te enaka koisey, “Amikhan(BJP) ke election homoitey Rahul Gandhi laga jarurat asey.”

Assam CM Himanta Biswa para etu kotha tu senior Congress leader Rahul Gandhi ke arrest kora te delay huwa te react kurikina koisey.

Assam laga Chief Minister para bar bar etu kotha dohraisey ki “ Election laga homoitey, Rahul Gandhi laga mojudgi para BJP ke faida pungchai.”

Etu ekla nohoikina, Sarma para enaka bi koisey ki BJP tu utu sob jaga te election jitibo kuntu ke Congress leader Rahul Gandhi para Bharat Jodo Nyay Yatra te  cover kurisey. 

Assam CM Himanta Biswa Sarma para koisey ki Rahul Gandhi tu Lok Sabha election khotom huwa picheyte arrest hobo.

Tai para koisey ki Assam Police para Rahul Gandhi ke January 22 te Bharat Jodo Nyay Yatra chuli thaka homoitey Guwahati te gondogol olaidiya nimitey general election picheyte arrest kuribole asey.

Assam CM Himanta Biswa Sarma para koisey, “Amikhan para taikey(Rahul Gandhi ke) Lok Sabha election picheyte arrest kuribo. Ekta SIT para etu mamla te jaanch kuribo.”

Assam laga Chief Minister para koisey : “Judi amikhan para taikey etya arrest kurisey koiley, manu khan para etu tu political(rajneetik) faida nimitey kora laga asey koikina bhabna kuribo.  Ki hoisey koilebi amikhan(BJP) jitibole asey.”

Etu majotey, Congress leader Rahul Gandhi para Assam te ekdam biya corruption(poisa kha laga mamla) chuli thaka nimitey  Assam CM Himanta Biswa Sarma laga opor te gusa jataisey.

Tai para aro ekbar etu  dohraisey ki Himanta Biswa Sarma tu India laga sobsey bisi corrupt thaka Chief Minister asey.

Rahul Gandhi para All India United Democratic Front (AIUDF) laga president, Maulana Badruddin Ajmal ke bi  target kurisey .

Ekta public rally te bhasan dikina, Rahul Gandhi para koisey ki rajya laga manu khan para chola aro kina sob bustu te Assam Chief Minister laga share thakisey.

Aro koisey ki Kaziranga National Park visit kora te bi Himanta Biswa Sarma laga faida asey kilemaney tai para tatey ekta resort banaikina asey.