Regional

ITLF: Manipur sarkar para militant group ke authority didisey, President Rule jaruri hoijaisey

January 26, 2024

Imphal, January 25 : Indigenous Tribal Leaders’ Forum (ITLF) para Manipur aro central government para rajya laga MLA aro MP khan ke Arambai Tenggol (hathyar bukhikina thaka Meitei militant group) para meeting rakha tu attend kuribole allowed kora nimitey gusa jataisey.

ITLF para koisey ki ekta sena kun para masoom manu khan ke attack korey, taikhan para Manipur laga kanoon bana manu khan(MLA khan) aro Chief Minister N Biren Singh ke bi taikhan para rakha meeting ke attend kuribole order disey aro MLA khan ke taikhan laga demand ke support kuribole disey.

ITLF laga bayan te koisey ki Arambai Tenggol laga leader Korounganba Khuman  tu police gari te Imphal te meeting rakha jaga te pungcha homoitey Manipur state police aro central security forces khan tu chup chap buhikina saithakisey aro etu militant group tu MLA khan ke kosok-kha ceremony te lead kuribole nimitey agey barisey.

ITLF para koisey ki central government para patha ekta special team tu Imphal seher te etu meeting huwa jaga laga aas paas te camping kurithaka laga bawajut bi etu sob hoisey.

Aro koisey ki Khuman tu ekta shadowy figure(khufiya manu) asey kun pichey fale para string tani asey aro tai ki kuri asey etu lukai asey. Tai tu lagatar nijor laga rifle dhora picture aro video khan post kuri thakey aro khula khuli tribal manu khan ke hamla kuribole laga bahsan diye.

ITLF para enaka sawal kurisey, “ Central government para etu manu laga khilaf te kinimtey action luwanai?” Aro koisey ki Arambai Tenggol laga manu khan para armouries(army, police khan laga hathyar khan rakha jaga) para chor huwa khatarnak hathyar khan  khula khuli display kora laga bi bisi video asey. Aro koisey ki Arambai Tenggol para sarkar para issue kora hathyar ke lukabole jaruri asey koikina bi bhabna nokorey.

 ITLF para  koisey, “Aji(Jan 25) laga event para dikhaisey ki Mnaipur laga sarkar para taikhan laga authority tu ekta hathyar dhora militant group ke didisey. Central government para Manipur te pura puri sarkar laga authority nathaka hoijabole para rokhabole laga ekta hey tarika asey aro etu tarika tu President Rule ana laga asey. Etya nukurise koiletu, kitya kuribo?”