Guwahati, January 23 : Tuesday phujur te Bharat Jodo Nyay Yatra ke Guwahati te gusibole para Congress party workers aro Assam police majotey jhagra ola picheyte Assam Chief Minister Himanta Biswa Sarma para rajya laga police ke Rahul Gandhi laga against te bhir ke provoke kora nimitey ekta case file kuribole koisey.
Assam CM para X(Twitter) te koisey, “Etu khan tu Assamese culture laga hisa nohoi. Amikhan tu ekta shanti rajya asey. Enaka ‘Naxalite tactics’ tu amikhan laga culture nimitey ekdam nutun asey. Ami para @DGP AssamPolice ke apni laga leader @Rahul Gandhi against te bhir khan ke provoke kora nimitey ekta case register kuribole koisey aro apni laga twitter account te apni laga footage ke sabut nisna cholabo.”
Assam police para Tuesday din te Bharat Jodo Yatra ke continue kuribole nimitey Khanapara para Guwahati te gusibole kosis kora 5,000 maan Congress worker khan ke rokhaidisey.
Etu ghotna te Assam police para lathi charge kora laga ghotna bi olaisey kotey kunba congress workers khan jokhom khaisey.
Etu ghotna huwa homoitey , Assam Police laga top police official mojud thakisey jitya Rahul Gandhi para chola Bharat Jodo Yatra tu Guwahati seher te eman gusibole mon kuri thakisey. Etu top police official khan para etu Yatra ke seher te gusibole nidibole kosis kuri asey.
Etu mamla tu Congress party para Himanta Biswa Sarma laga sarkar para ety Yatra te rasta block kuridi asey koikina iljam laga picheyte olaisey.
Guwahati border osor te jama huwa manu khan ke address kurikina Rahul Gandhi para koisey ki tailaga party worker khan tu kitya bi kanoon nabhangabo aro kanoon aro beybosta te badha na anibo; hoilebi, “etu laga matlab amikhan kamjor asey nohoi.”
Guwahati te jabole ageyte, Rahul Gandhi para koisey ki Union Home Minister Amit Shah para Assam laga CM ke taikey student khan ke lok kuribole para rokhabole adesh disey. Rahul Gandhi tu Tuesday din te student khan ke lok kuribole thakisey.
