Guwahati, March 26 : Chief Minister Himanta Biswa Sarma para state Congress Chief Bhupen Borah joldi hi BJP join kuribo koikina dawa kora picheyte, Bhupen Borah para koisey ki tai para joldi hi ekta defamation case file kuribo.
Jorhat te media ke kotha kurikina, Borah para CM Himanta Biswa Sarma ke enaka bayan dikina mamla khan ke divert kora laga iljam lagaisey.
Etu mamla te kotha kurikina, Borah para koisey, “ Media ke ami hosa hosi laga rasta te jai asey koikina biswas dilabole nimitey, ami para kali Chief Minister Himanta Biswa Sarma laga khilaf te ekta defamation case file kuribo.”
Tai para dawa kurisey ki misa misi bayan diya tu Himanta Biswa Sarma para homoi homoitey asol mamla para dhyan hatabole nimitey chola ekta tactic asey.
Borah para etu bi dawa kurisey ki tai BJP join kuribole laga eku karon nai.
Tai para koisey, “Ami ke nalagey ki ami BJP join kurisey koiley taikhan para manu laga problem solve kuribo. Taikhan para Assam laga 6ta community laga mamla logotey deal nukuribo nahi voting hobole ageyte kuribole kosom kha kaam khan kuribo.”
Tai para etu bi koisey ki CM Himanta para etya tak ki ki kosom khaisey etu pura kuribole nakamyab hoisey. Aro etu nimitey misa misi bayan dikina media aro rajya laga manu khan laga dhyan hatabole kosis kuri asey.
Chief Minister Himanta Biswa Sarma para dawa kurisey ki state Congress chief Bhupen Borah para 2025 te Bharatiya Janata Party (BJP) join kuribo.
Assam laga Chief Minister, Himanta Biswa Sarma para Lakhimpur te media ke kotha kora homoitey koisey ki tai tu sure thakisey ki 2025 te Bhupen Borah para BJP join kuribo.
Tai para etu statement tu ekta sawal ke jawab di thaka homoitey disey kotey taikey hudisiley ki judi 2026 Assembly election te tai Bhupen Borah ke ekta opponent nisna face kuribo.
Assam CM para etu sawal te jawab dikina koisey ki etu tu possible thakanai kilemaney Borah bi 2026 te BJP laga ekta member hobole asey.
Tai para agey barikina dawa kurisey ki 2026 tak te, Hindu-majority area te Congress nathaka hoijabo aro Muslim-majority area para bi Congress hatijabo.
Sarma para agey barikina MLA Bharat Narah para Congress parea resign kora laga kotha koikikina tai tu BJP join kuribo parey koi thakisey.
Tai para koisey ki Bharat Narah aro tailaga maiki Ranee Narah duijun laga phone bi switch off hoikina asey aro taikhan BJP join kora laga eku proper discussion thakanai.
Add Comment