Guwahati, January 28 : Poila laga All Assam Students Union (AASU) president Dipanka Nath para koisey ki Bharatiya Janata Party (BJP) laga sarkar para Assam laga manu khan ke kiba ekta disey kuntu para taikey bisi impress kuridisey.
Nath tu January 28 te Guwahati te ekta ceremony te BJP join kurisey. Etu event te kotha kora homoitey, Nath para koisey ki AASU para utha alag alag mamla ke Chief Minister para pura kurisey. Tai para khas kurikina delimitation exercise laga kotha kurisey kuntu para tailaga hisap te, Assam laga manu khan ke constitutional suraksa disey.
Nath para enaka koisey, “ Amikhan para bisi alag alag demand nimitey campaign kurisey, aro etu sob demand majotey Chief Minister para bisi bhak demand te solution anisey. Assam te BJP sarkar aha picheyte Assam Movement te jaan diya manu laga parivarkhan ke modod dibole nimitey bisi kadam uthaisey. Sarkar para delimitation laga mamla te kadam utha tu juwa 30 saal para Assam laga students union para demand kurikina ahi thaka laga thakisey. Aro Chief Minister para etu mamla te kadam uthaisey.”
Etu ex-AASU president para etu bi koisey ki poila laga sarkar ar Congress laga sarkar khan tu naukri bikri kuri thakisey. Tai para koisey ki BJP sarkar para rajya te 1 lakh sarkari naukri dibole laga kadam utha tu poila te students union para demand kurithaka laga hisap te asey.
Nath para enaka koisey, “ Poila laga Congress sarkat para naukri bikri kuri thakisey. Poila laga sarkar para teacher laga naukri bikri kurikina bi poisa kamaisey. Utu ke compare kurise koiley, ami tu BJP sarkar para ek-taka poisa bi noloikina 1 lakh government job dibole kadam utha para ekdam impress hoikina asey. Etu tu students union para bisi lamba homoi para demand kurikina aha laga thakisey ki jawan student khan para naukri pabo lagey aro selection exam khan tu safa para conduct kuribo lagey.”
Nath para enaka bi koisey ki BJP sarkar para utha alag kadam jaiseki international border seal kuridiya aro Satra laga zameen khan te illegal tarika para boha manu khan para aad kuridiya para Assam laga manu khan ke ekta suraksa disey.
Dangor kotha tu etu asey ki Dipanka Nath logotey, poila laga AASU vice-president Prakash Das para bi January 28 te BJP join kurisey.
