Shillong, January 28 : Supreme Court para Meghalaya high court laga ekta faisla ke rokhaikina rakhisey kuntu para rajya laga sarkar ke custody te manu murija laga case te Rs 10-15 lakh compensation terabole order disiley.
Supreme Court para stay order issue kora matlab tu Meghalaya High Court laga etu faisla tu etya rukhikina asey.
Meghalaya High Court para enaka shart rakhisey ki National Human Rights Commission (NHRC) para kimat faisla kora laga etu compensation tu Meghalaya sarkar para terabole lagibo.
Meghalaya laga sarkar para appeal kora picheyte, Supreme Court laga ekta bench kuntu te Justice BR Gavai, Sanjay Karol aro Sandeep Mehta shamil thakisey, taikhan para Meghalaya High Court laga faisla ke rokhaikina rakhibole laga order issue kurisey. Aro 4 hapta bhitor te ekta jawab file kuribole lagey koikina koisey.
August 2023 te, Meghalaya High Court para nijor file kora ekta case te investigation(nohoilebi puch-tach ) kora authorities khan para police custody te thaka manu khan laga opor te ekdam kara, third degree tarika chola nimitey murija laga mamla te chinta jataisiley.
Meghalaya High Court para koisey ki police custody te manu mora tu titya hey rukhibo jitya compensation(jurmana terabole lagiya) tu enaka level te pungchibo kotey rajya laga sarkar para dangor financial(poisa len den kora laga ) natija bhuktibo lagibo.
