Rajasthan Royals teamlaga nam te Assam cricketer Riyan Parag pora Indian Premier League (IPL) te ektam phal pora khiliya biche te, state laga jawan cricketer toh headlines te ase.
Assam laga fast bowler Mukhtar Hussain Ranji Trophy 2018-19 match te nam kama manu ke Australia laga Brisbane te tweit habta laga training karne chunise, Assam Cricket Association laga office bearer pora koise.
Tai ke toh Chennai based MRF Pace Foundation pora tai laga cricket skills aro odhabole kare chunise.
Tetu tweita habta laga training camp toh May 11 pora May 25 tok dhakibole ase.
Hussain toh training laga somoy te bio-chemical tests te jabole lagibo, tai pora koise.
Bio-chemical tests laga opor te, Hussain ke Brisbane laga National Cricket Academy te training dibole ase.
Hussain pora Ranji Trophy 2018-19 matches te Assam karne ektam bishi fast bowl skills logot te score kurise.
Ranji Trohy season 2018-19 te 9 matches te 40 wickets kamabole parise.
Tai laga bowling skills karne, bowler ke MRF Pace Foundation pora Australia te training session lobole karne chunise.
Hussain pora alak toh, Karnataka-based fast bowler Prasidha Krishna ke bhi Australia laga training session karne chunise.
Etu tweita bowlers ke toh international training session karne chunise aro enika katam toh Indian pace bowlers khan ke aro odhabole karne lowa katam ase koise.
Add Comment