Guwahati, January 26 : Assam laga cabinet minister Jayantamallah Baruah para koisey ki Rahul Gandhi laga Bharat Jodo Nyay Yatra laga asar tu khali Miya Muslim khan boha jaga khan te hey hobo.
Etu Yatra laga impact(asar) laga kotha kurikina, Baruah para koisey ki Rahul Gandhi aro Congress tu Assam te Miya voter khan ke target kurikina ahisey. Tai para enaka bi koisey ki Assam laga bisi indigenous manu khan boha jag ate etu Yatra laga eku asar nidikhibo.
Baruah para enaka koisey, “ Miya laga area khan te olop asar hobo. Taikhan tu yatey Miya khan ke target kurikina ahisey. Kotey indigeneous manu khan bohey, tatey etu yatra laga asar huwa laga eku sawal hey nai kilemaney tatey Yatra attend kora manu tu 10ta nohoiley 15ta maan hey thakisey. Tatey eku asar nuhuwa nimitey, taikhan para media laga through para naam kamabole aro olop impact banabole nimitey jhamila khara kurisey. Taikhan para nijor ke promote kuribole nimitey kunba harkat khan kurisey. Aro asar tu Miya area khan te hobole asey. Amikhan ke Miya khan laga vote nalagey. Etu nimitey Miya khan tu taikhan logotey thakibo. Amikhan laga subhkamna taikhan logotey asey.”
Baruah para enaka etu nimitey koisey kilemaney Lower Assam te aro khas kurikina Barpeta aro Dhubri district te etu Yatra kora homoitey bisi bhir dikhibole asey aro etu area khan tu Miya Muslim khan bisi thaka area asey. Assam laga Chief Minister para social media te share kurisiley ki etu Yatra chola homoitey utu jaga khan te dangor bhir thakisey kotey rajya laga majority jati khan nobohey.
Dangor kotha tu etu asey ki jhamila aro mara mari kora laga ghotna ola majotey Bharat Jodo Yatra para Assam laga programme tu khotom kurisey. January 25(Thursday din) te etu Yatra tu West Bengal te gusisey.
Miya khan laga kotha kurikina, Jayantamallah Baruah para enaka bi koisey ki taikhan para Miya jati khan ke dushman nisna nasai, hoilebi enaka manu khan para Assam laga bhasa, culture aro population ke swallow kuribole kosis kuri asey.
Add Comment