Assam Police para Amit Shah laga fake video logotey link thaka manu ke arrest kurisey

Guwahati, April 29 : Assam Police para April 29 te Reetom Singh koikina ekjun manu ke arrest kurisey. Kun laga Home Minister Amit Shah shamil thaka ekta fake video feila te link asey. Etu video tu bisi alag alag social media platform te circulate hoi asey. Union Minister Kiren Rijiju para April  29 te social media te Home Minister AMit Shah laga modify kurikina thaka video share kora nimitey Indian National Congress ke nisana banaisey. Rijiju para ekta split-screen video post kurisey kuntu te nakli aro original version majotey fark thaka dikhaisey aro likhisey, “Congress Party laga opor te sorom asey. Ami para Congress ke fake aro edited video feila nimitey strongly condemn kuri asey. Home Minister Amit Shah laga kotha twist hoijaisey. Public ke gumrah kora tu democracy nimitey khatarnak asey. Etu gaizimidar beybohar logotey shanti bhang kuribole laga takat asey.” Tai para koisey ki Amit Shah laga kotha khan ke twist kora para public ke gumrah kuri asey aro democracy ke kamjor kuridi asey. Aro shanti ke disturb kuribole warning disey. Etu ageyte, Delhi Police para etu video circulate huwa laga khilaf te FIR file kurikina kanooni action loisiley. Ministry of Home Affairs para etu complaint ke support kurisey. Kuntu laga natija tu Special Cell of the Delhi Police para IPC aro IT Act laga relevant section under te FIR register kurisey. Etu case laga connection te pura desh bhor te arrest hobole expect kuri asey.