Guwahati, February 27 : Assam te Citizenship Amendment Act (CAA) lagu hobole tayari chuli thaka homoitey, Assam Police tu etu homoitey protest olabole pariya laga situation nimitey tayari kuri asey. Aro March 10 para loikina sob police leave cancel kuridibole laga order issue kurisey. Etu kadam tu enaka homoitey uthaisey, jitya police force para etu CAA implement kuribole laga khilaf te thaka party organization para eku bi protest khan kuribole thakiya ke rokhabole tayari kuri asey.
Etu janibole parisey ki Assam laga DGP tu 2019 te CAA laga khilaf te andolan kora homoitey sobsey biya para affect huwa district laga sob police officer logotey juwa ek hapta te meeting rakhisey. Kuntu te, Dibrugarh, Jorhat aro Golaghat laga police station laga Officer in Charge khan bi thakisiey. Etu picheyte Guwahati te sob officer aro Officer in Charge khan logotey meeting rakhisey.
Sources laga hisap te, DGP GP Singh para officer khan ke sob police station te tear gas, lathi aro bhir ke control kuribole laga bustu khan tayar kurikina rakhibole instruction disey.
India Today NE ke kotha kurikina Assam DGP GP Singh para CAA laga opor te eku kotha kuwanai. Aro koisey ki Assam police tu sob situation nimitey tayari kuri asey, kilemaney election tu joldi hi announce hobole nisna asey.
GP Singh para enaka koisey, “Amikhan tu sob situation nimitey tayari kuri asey, kilemaney election tu joldi hi announce hobole nisna asey. Amikhan laga tayari tu election hobole ageyte aro chuli thaka homoitey rajya te shanti laga mohol banaikina rakhibole laga asey. Taki sob vote diya manu khan tu khusi para vote dibole chance pabo aro election tu hosa hosi conduct kuribo.”
Tai para agey barikina koisey ki, Assam police tu rajya te ki hoisey koilebi shanti maintain kurikina rakhibo paribo.
Ageybarikina, duty te thaka officer khan ke kara warning issue kurisey, ki taikhan para eku bi galat tarika para handle kurisey nohoile golti kurisey koiley kara disciplinary action jhelibole lagibo. Aro taikhan tu suspend hobole nohoile taikhan ke naukri para olaiibo bi parey. Sob district te Top police khan ke CAA kaga against te ja laga harkat khan ke support kora dikhisey koiley etu te action lobole nimitey bhal para instruction disey.
Add Comment