Guwahati, March 12 : Tuesday(March 12) te Assam te Citizenship amendment act (CAA) implement kora laga against te thaka manu khan para protest kurisey. Etu protest te, Prime Minister Narendra Modi, home minister Amit Shah laga putla aro kanoon laga copies khan jolaisey.
Asom Jatiyatabadi Yuba Chatra Parishad (AJYCP) para Assam laga Lakhimpur te, Prime Minister aro home minister laga putla jolaisey. Aro Congress member khan para bi Lakhimpur distric laga alag alag jag ate CAA lagu huwa tu khusi napaikina thaka tu jatabole nimitey kanoon laga copy khan jolaidisey.
Assam assembly laga opposition leader Debabrata Saikia para Congress party laga Guwahati te thaka state headquarter, Rajiv Bhawan laga bahar te Congress worker khan ke protest kora te lead kurisey. Tatey taikhan para CAA laga copies khan jolaisey.
Etu nisna, CPI-M para Kamrup district laga Guwahati aro Rangia town te etu act laga khilaf te protest rakhisey. Aro alag alag college laga student khan para Guwahati te nijor nijor college bahar te protest rakhisey.
Sivasagar district te, Raijor Dal, Krishak Mukti Sangram Samiti, Chatra Mukti Parishad aro MLA Akhil Gogoi para Central government laga khilaf te nara lagaikina etu CAA ke jordar para oppose kurisey.
Barpeta aro Nalbari district para bi Congress aro AJYCP para CAA laga copy khan jola laga reports olaisey.
Hoilebi, 16-party thaka United Opposition Forum Assam (UOFA) para 12-hour ‘Sarbatamak Hartal’ rakha te bhal jawab panai. Sivasagar, Golaghat, Nagaon aro Kamrup nisna olop district khan te hey dukan aro business bon kora dikhisey.
Etu plan kurikina kora protest laga jawab te, Assam police para opposition party khan ke notice issue kurisey aro taikhan ke etu hartal tu hataibole request kurisey.
Aro judi police para public property ke barbad hobole para bachabole aro public laga suraksa nimitey order issue kora tu namanisey koiley taikhan laga khilaf te kanooni action lobole warning disey.
Saikia para koisey ki CAA laga khilaf te etu party para shanti aro democratic protest kuribo.
Etu majotey, Assam laga Sonitpur district administration para CrPC laga Section 144 impose kurikina public jaga khan te meeting, protest, procession aro nara lagabole mana kurikina asey.
Rajya te security measure baraidisey. Aro khatarnak area te extra police aro commando khan ke duty te dhalidisey.
All Assam Students’ Union (AASU) aro 30 non-political indigeneous organization khan para shaam nimitey torchlight procession plan kurisey aro CAA laga khilaf te taikhan laga awas uthabole nimitey Wednesday (March 13) para ekta satyagraha suru kuribole asey.
Etu opor te, AASU laga team bi Supreme Court te etu Act laga khilaf te ekta petition dibole nimitey New Delhi te jaisiley aro leader khan tu shaam te hobole thaka procession nimitey wapas ahisey.
