Imphal, January 22 : Mnaipur laga Chief Minister N Biren Singh para Sunday(January 21) te atangwadi hamla laga sikar huwa manu khan ke poisa laga modod disey aro Bishnupur District laga Kha Khunou Ningthoukhong te 4jun masoom busti manu khan ke moraidiya tu kara para condemn kurisey.
Sunday laga din fale etu murija 4jun busti manu laga parivar khan ke lok kurikina, Chief Minister para media ke koisey ki sarkar para mujrim ke bisarikina olabo aro etu matti laga kanoon hisap te taikhan ke sajai dibo.
Manipur CM para etu visit kora tu Joint Action Committee para etu 4jun masoom kheti te kaam kora manu ke biya para moraidiya laga khilaf te January 20 te taikey ekta memorandum submit kora picheyte asey. Etu 4jun ke titya moraisey jitya taikhan January 18 te taikhan lagag kheti ke sai thakisey.
CM para koisey ki etu manu khan laga parivar khan thaka laga halat tu saikina bisi dukh lagisey. Aro koisey ki etu murija manu khan tu chutu baccha khan aro umar hoija ama baba ke pichey charikina jaisey.
Etu picheyte CM Biren Singh para tailaga X account te koisey ki sarkar tu mujrim khan ke dhuribole nimitey sob support dibo aro etu ghotna nimitey taikhan ke sajai dibo.
Joint Action Committee para CM ke memorandum diya te enaka koisey ki January 18 te Ningthoukhong Kha-Khunou te Kuki atangwadi khan para moraidiya 4jun kisan laga dead body tu judi 48 ghonta bhitor te taikhan laga demand pura nukurisey koiley claim nukuribo.
