Aizawl, Janaury 22 : Mizoram laga apex student body para centre laga Free Movement Regime (FMR) ke hataidibole aro India-Myanmar border te border fencing dhalibole laga faisla ke kara para oppose kurikina Prime Minister Narendra Modi ke ekta memorandum submit kurisey.
Etu student body para taikhan laga memorandum tu Governor Hari Babu Kambhampati laga through para PM Modi ke submit kurisey. Taikhan para India laga Vice President, Union Home Minister aro Union Home Secretary ke bi etu memorandum laga copy pathaisey.
Taikhan laga letter te, Mizo Zirlai Pawl para taikhan laga dangor chinta aro India laga sarkar para India-Myanmar border fale Free Movement Regime(FMR) aro border fencing laga faisla luwa laga khilaf te thaka tu bi janaisey. Taikhan para kuwa hisap te enaka kora para India aro Myanmar te boha Zo jati laga manu khan ke alag kuridibo.
Taikhan para etu bi koisey ki Zo manu khan ke British para India ke cholai thaka homoi para administrative division para aro British laga rule khotom huwa picheyte international boundary para alag kuridisey. Enaka alag kuridiya picheyte bi India laga sarkar para boundary te Free Movement Regime(FMR) lagu kora nimitey taikhan tu alag hoija nisna nalagey koisey. Etu FMR para India aro Myanmar border laga opposite side te boha Zo jati laga manu khan tu ek dusra laga funeral, shaddi laga ceremony, ghor te bimar thaka manu ke lok kuribole, dhormic meeting khante join kuribole aro local level sports tournament te shamil hobole pari asey koisey. Hoilebi ajikali etu FMR ke hataidibole faisla luwa para taikhan laga etu jaruri chij ke chini asey aro ekta manu hoikina taikhan para taikhan laga haak chini asey koikina koisey.
Taikhan para agey barikina koisey ki taikhan tu India laga Government tu United Nations Declaration on the Rights of Indigeneous Peoples 2007 (UNDRIP) te world power aro signatory asey koikina ekdam asurit hoi asey kilemaney UNDRIP tu indigeneous manu khan laga problem ke sai aro Zo manu khan nisna international boundary para alag hoija indigeneous manu khan laga problem ke bi sai.
Mizo Zirlai Pawl(MZP) para India laga sarkar ke taikhan laga faisla tu wapas loilobole request kurisey. Taikhan para border fale para drugs laga dhanda kora laga mamla ke sabole nimitey taikhan laga indigeneous community khan ke bhak kuridiya laga action noloikina alag tarika bisaribole lagey koikina samjhaisey.
Etu student body laga leader khan para koisey ki taikhan tu etu mamla te January 23 te ekta meeting kuribole asey. Aro taikhan tu etu mamla te agey action lobole tayar asey.
