Nagaland

Awareness para action: kohima students drug-free movement join kuriase

11 months ago

Kohima, 10 April 2025: “Life te jitibo nimite balance lage—body, mind, aru spirit laga,” etu powerful kotha koi kena, Moasunep K. Jingru, EAC (Development) aru Nodal Officer for Nasha Mukt Bharat initiative in Kohima district, ekta bhal awareness program suru kurise, juntu Nasha Mukt Bharat Abhiyan under te Kohima District Narcotics Coordination Committee (NCORD) para organize kuri se, collaboration te T.M Higher Secondary School, Kohima logot, 10th April 2025 te.

Students aru teachers ke address kuri kena, Moasunep emphasize kurise ki substance abuse to physical health, mental clarity, aru spiritual grounding ke biya kure – juntu sob life te success pa bole important ase. “Drugs body ke nohoi, mind ke bhi biya kure, aru moral compass ke komzor banai di,” tai koi se. Tai students ke encourage kurise ki ekta discipline, bhal decision aru strong values oporte life build kuribo lage.

Tai warning bhi dise ki aji kali laga modern addiction – screen time aru social media – bhi ekta khatra ase. Students ke vigilant aru self-aware thakibole advice dise. “Juntu para dimak duk de, etu limit kuribi. Dimak ke knowledge dibi, noise nohoi,” tai advice dise.

Program laga ekta important part to eye-opening session thakise Capt. Dr. M. Vikas Kumar Reddy, Medical Officer of 13 Assam Rifles para. Tai explain kurise ki drug para brain function te ki bhab effect kure, ki organ biya hoi, aru kunba case te to death bhi hoijai. Tai stimulants, depressants, aru hallucinogens laga khatra bhi detail te janai dise.

Tai students ke caution dise ki misinformation, curiosity, aru peer pressure youth majot drug chola laga ekta dangor reason ase. “Vaping aru energy drinks bhi danger laga start point hobo pare,” tai warning dise. Tai message to clear thakise: “Start nakuribi—charibole to easy nahoi.”

Program te students, teachers, healthcare professionals, armed forces laga members, aru community stakeholders sob participate kurise—ekjon ekjon miliki kena ekta drug-free society banabole commitment janai dise.

Event to prayer logot suru hoise, juntu Vivozonuo Miachieo para kuri se. Program chair kurise school laga Vice Principal, Khriezoseituo Suohu, juntu sob resource persons aru attendees ke thanks janai dise impactful aru inspiring session karone.