Imphal, March 26 : Sunday din te Manipur laga Imphal West district te bhoi laga mohol hoijaisey. Etu tu Imphal West district laga jaga Bamdiyar Machin Manao te ekta bomb dhalikina asey koikina rajya laga ekta police para whatsapp message pa pichetey hoisey.
Etu khobor tu pa pichetey Manipur police laga bomb dispose kora team , criminal investigation department (CID) aro Nambol Police station laga police khan joldi se utu jaga te pungchisey.
Manipur laga police para etu bomb laga khobor tu Sunday (March 26) te morning 7:30 am fale paisey.
Etu Manipur laga bhitormanu khan boha camp laga osor te bomb dhala laga khobor para utu area te thaka local manu khan ke bhoi khilaidisey.
Etu Nambol police station laga under te thaka Bamdhiyar busti laga main road osor te bomb dhalikina asey koikina suspect thaka para bhoi khilaidisey aro local manu khan ke ghor laga bhitor te thakibole majboor kuri disey.
Police para utu area ke gherisey aro etu suspect thaka bomb ke hatai dibole ekta operation launch kurisey.
Hoilebi utu jaga te pungcha pichetey Manipur police laga expert laga team para ekta packet paisey . Hoilebi etu packet laga talashi luwa homoitey taikhan para janisey ki etu bomb laga bhoi khila tu ekta chal thakisey.
Manipur police laga bomb disposal squad para box ke khulisey aro etu box laga bhitor te ekta itta paisey.
Manipur police para koisey ki etu bomb laga bhoi khila tu ekta chal thakisey.
Manipur laga police para koisey ki kunba manu khan para etu box ke dikhisey aro etu te ekta bomb asey koikina suspect kurisey. Aro etu para busti manu khan laga majotey bhoi humaidisey .
Sunday(March 26) te People’s Revolutionary Party of Kangleipak (PREPAK) para taikhan laga 43rd Red Army Uprising Day manaisey.
Add Comment