Imphal, March 26 : Samaj ke asurit kuridiya aro kandai diya laga ekta darawana ghotna te Manipur laga Kangpokpi district te ekta Class 12 laga exam di thaka student ke ekta chinibo napara laga gunman para guli marikina morai disey. Etu hatsa te sikar huwa student laga umar tu 17 saal asey. Tai laga naam tu Seigunlal Misao asey aro tai tu Damdei Christian School te puri thakisey.
Reports laga hisap te duijun bike te boha badmash kuntu te ekjun tu maiki thakisey taikhan para Misao ke March 25 te 8:30 pm fale Motbung Public Health Centre laga agetey khula khuli guli maridisey. Ekta police official para koisey ki etu hatsa huwa homoitey Saigunlao Misao tu 39 Imphal Dimapur National Highway te Motbung PHC para Motbung Model Village te ghor wapas ahi thakisey. Tai laga gao te duita guli lagisey.
Etu ghotna para utu area fale gusa uthaidisey. Aro gusa uthikina thaka local manu khan para NH-39 rasta tu block kuridisey aro etu hatsa te sikar huwa manu nimitey nyay mangisey.
Etu Misao ke guli mara apradhi khan tu kun asey aro taikey hamla kora laga pichetey ki maksat asey etu tu etya tak bi najanikina asey. Police khan para etu mamla te investigation kuri asey. Misao laga homoi nuhuwa agetey mora para tai laga parivar aro sathi khan ke shock te rakhidisey. Aro samaj para etu apradhi khan ke sajai dibole nimitey joldi action lobole koi asey.
Authorities khan para public ke biswas dilaisey ki taikhan para etu ghotna ke investigate kuribole aro mujrim khan ke sajai dibole sob jaruri kadam uthai asey.
Add Comment